اۋىلدىق جەرلەردەگى دەنساۋلىق ساقتاۋ ماسەلەلەرىن پرەمەر-مينيستردىڭ اتىنا جولداعان دەپۋتاتتىق ساۋالىندا سەناتور امانگەلدى تولاميسوۆ كوتەردى.
سەناتوردىڭ پىكىرىنشە، اۋىلدىق مەديسينالىق مەكەمەلەردىڭ بارلىق پروبلەمالارى ەلدەگى ەمحانالار مەن اۋرۋحانالاردىڭ دۇرىس قارجىلاندىرىلماۋىنىڭ سالدارىنان بولىپ وتىر، دەپ حابارلايدى Almaty-akshamy.kz.
«جىل سايىنعى بيۋدجەتتى بەكىتۋ كەزىندە ۇكىمەت 2021 جىلعى ناقتى تاپشىلىقپەن ناقتى شىعىندار بويىنشا ەسەپتەۋلەر جۇرگىزگەن، ايقىن تاپشىلىقتار بايقالادى. وكىنىشكە قاراي، دەنساۋلىق ساقتاۋ مينيسترلىگى دە، ءامسق دا وسى ۋاقىتقا دەيىن بۇل قاراجاتتىڭ ۇلعايۋىنا قول جەتكىزگەن جوق. سونىڭ سالدارىنان وسى جىلدىڭ 9 ايىنىڭ قورىتىندىسى بويىنشا دەنساۋلىق ساقتاۋ ۇيىمىن قارجىلاندىرۋدا كۇردەلى جاعداي قالىپتاستى. باستاپقىدا مىندەتتى مەديسينالىق ساقتاندىرۋ جۇيەسىندە ستاسيونارلىق جانە ستاسيوناردى الماستىراتىن كومەك كورسەتۋگە بولىنگەن قاراجات كولەمى 2022 جىلى مەديسينالىق ۇيىمدار مالىمدەگەننىڭ 70-77%-ىن قۇرادى. قازىرگى جاعدايدا دەنساۋلىق ساقتاۋ ۇيىمدارى ەڭبەكاقى تولەۋ بويىنشا، سالىقتى ۋاقىتىلى تولەۋدە، دارى-دارمەك پەن ازىق-تۇلىك ساتىپ الۋدا، كوممۋنالدىق قىزمەتتەردى تولەۋدە قيىندىقتارعا تاپ بولۋدا»، - دەپ اتاپ ءوتتى امانگەلدى تولاميسوۆ.
سەناتور دەنساۋلىق ساقتاۋ سالاسىنداعى اۋىلدىق ەمحانالاردىڭ تەحنيكالىق جاراقتاندىرىلۋىن دا وزەكتى ماسەلە ەكەنىن اتاپ ءوتتى. اۋداندىق مەديسينا ۇيىمدارىنىڭ تەڭگەرىمىندەگى اۆتوكولىكتەردىڭ 80%-ى تەحنيكالىق جاعىنان ەسكىرگەن.
«اۋىلدىق جەردەگى كورسەتىلەتىن مەديسينالىق قىزمەتتىڭ قولجەتىمسىزدىگى مەن مامانداردىڭ تاپشىلىعىنان اۋىل حالقى جاپپاي اعايىن-تۋىس جاعالاپ، قالاعا كەلىپ ەمدەلۋگە ءماجبۇر بولىپ ءجۇر. وسى ورايدا، امبۋلاتوريالاردىڭ، اكۋشەرلىك پۋنكتتەر بويىنشا، جەدەل جاردەم كولىكتەرى بويىنشا، جالپى، العاشقى مەديسينالىق كومەك كورسەتۋ جۇيەسىن جاقسارتۋ بويىنشا ۇكىمەت جەدەل شارالار قابىلداۋ كەرەك دەپ ەسەپتەيمىن»، - دەپ اتاپ ءوتتى ول.