پارلامەنت سەناتىنىڭ ءتوراعاسى ماۋلەن اشىمبايەۆ باستاعان اەس سالۋدى قولداۋ جونىندەگى حالىق شتابى اباي وبلىسىنا باردى، دەپ حابارلايدى aqshamnews.kz
شتاب قۇرامىندا دەپۋتاتتار، ساراپشىلار جانە بەلسەندى ازاماتتار بار. ولار رەفەرەندۋمعا وراي ءاقپاراتتىق-تۇسىندىرۋ جۇمىستارى اياسىندا اۋىلشارۋاشىلىق ونىمدەرىن وندىرۋشىلەرمەن، ءبىلىم بەرۋ سالاسىنىڭ ماماندارىمەن جانە كوممۋنالدىق قىزمەتتەر سالاسىنداعى ەڭبەك ۇجىمدارىمەن كەزدەستى.
ءبىلىم بەرۋ سالاسىنىڭ قىزمەتكەرلەرىمەن وتكەن كەزدەسۋدە ماۋلەن اشىمبايەۆ اەس سالۋ ماسەلەسىنە كەشەندى كوزقاراس قاجەت ەكەنىن اتاپ ءوتتى. ول جاڭا تەحنولوگيالاردى زەرتتەپ، وندىرىسكە يننوۆاسيالاردى ەنگىزۋدىڭ ماڭىزدىلىعىنا نازار اۋداردى. سونىمەن قاتار، سەنات ءتوراعاسى دۇرىس شەشىم قابىلداۋعا كەدەرگى كەلتىرەتىن ەسكى ستەرەوتيپتەر مەن قاعيدالار تۋرالى دا ايتتى.
«اەس-تىڭ قاۋىپسىزدىگى كوپشىلىكتى الاڭداتىپ وتىرعانى بەلگىلى. مۇنداي الاڭداۋشىلىق نەگىزىنەن وتكەن عاسىرداعى يادرولىق سىناقتار مەن اپاتتاردىڭ سالدارىنان تۋىنداعانى تۇسىنىكتى. الايدا قازىرگى اتوم ستانسالارى سەنىمدى، ەڭ وزىق جانە تەكسەرىلگەن تەحنولوگيالارمەن سالىنىپ جاتىر. بۇل III جانە III+ بۋىندار تۋرالى ءسوز. ەگەر حالىق رەفەرەندۋمدا اەس سالۋدى قولداسا، ەلىمىزدە اتوم ەلەكتر ستانسياسى ەڭ جوعارى حالىقارالىق ستاندارتتارعا ساي سالىنىپ، تولىق قاۋىپسىزدىك قامتاماسىز ەتىلەدى. جوبانىڭ قاۋىپسىزدىگى ماگاتە مەن باسقا دا حالىقارالىق ۇيىمداردىڭ قاداعالاۋىندا بولادى»، – دەدى اشىمبايەۆ.