سەنات ءتوراعاسى ماۋلەن اشىمبايەۆ وتان قورعاۋشى كۇنىنە وراي Facebook پاراقشاسىندا قۇتتىقتاۋ جولدادى.
«بارشاڭىزدى وتان قورعاۋشى كۇنىمەن شىن جۇرەكتەن قۇتتىقتايمىن! بۇل كۇنى ەلدىڭ بەيبىت ءومىرى مەن تىنىشتىعىن قاس قاقپاي كۇزەتىپ تۇرعان اسكەري قىزمەتشىلەر مەن وسى جولدا ەسەلى ەڭبەك ەتكەن ارداگەرلەرگە ايرىقشا قۇرمەت كورسەتەمىز. بۇگىن وتاندى ءسۇيۋ، ۇلتقا قىزمەت ەتۋ، انتقا ادال بولۋ سياقتى قۇندىلىقتار دا كەڭىنەن دارىپتەلەدى. سوندىقتان ەلدىكتىڭ ىرگەسىن بەكەمدەۋدە بۇل مەرەكەنىڭ ماڭىزى زور» دەپ اتاپ وتەدى سەنات سپيكەرى.
ونىڭ ايتۋىنشا، شىن مانىندە وتاندى قورعاۋ — بارشامىزعا ورتاق قاستەرلى پارىز.
بيىل الاپات تاسقىنمەن كۇرەس كەزىندە حالقىمىز وسى مارتەبەلى مىندەتتىڭ وزىق ۇلگىسىن كورسەتە ءبىلدى.
جەرگىلىكتى تۇرعىندار ارنايى ماماندارمەن جانە ساربازدارمەن بىرگە بوگەت سالۋ ىسىنە ۇلكەن ۇلەس قوستى.
بۇل بەيبىت كۇندە جاسالعان ەرەن ەرلىكتىڭ جارقىن كورىنىسى ەكەنى انىق.
«مەملەكەت باسشىسى قاسىم-جومارت كەمەل ۇلى توقايەۆ اتاپ وتكەندەي، حالىق پەن ارميانىڭ مىزعىماس تۇتاستىعى دەگەنىمىز — وسى. الداعى ۋاقىتتا دا ەلىمىز ەڭسەلى بولىپ، اسكەرىمىزدىڭ الەۋەتى ارتا بەرسىن! ايتۋلى مەرەكەدە ءار شاڭىراققا شاتتىق، ازاماتتارىمىزعا اماندىق تىلەيمىن! ءارقاشان اسپانىمىز اشىق، ەلىمىز تىنىش بولسىن!» دەپ تۇيىندەدى ماۋلەن اشىمبايەۆ.