سەناتتا زاڭدى تالقىلاۋ بارىسىندا تاعى بىرنەشە وزگەرىس ەنگىزىلدى.
سەنات دەپۋتاتتارى سيفرلىق اكتيۆتەر تۋرالى زاڭ جوباسىن ماجىلىسكە قايتاردى، دەپ حابارلايدى Almaty-akshamy.kz
زاڭمەن ماينەرلەرگە ليسەنزيا بەرۋ ءتارتىبى ەنگىزىلەدى. ولار قازاقستاندا رەسمي تۇردە تىركەلۋگە مىندەتتى بولادى. وسىلايشا، ماينەرلەر زاڭدى تۇلعا رەتىندە تىركەلىپ، سالىق سالىناتىن سۋبەكتىگە اينالادى. ماينينگ-پۋلدار دا ەكونوميكانىڭ ءبىر بولىگى بولادى. ليسەنزيانى سيفرلىق دامۋ مينيسترلىگى بەرەدى دەگەن جوسپار بار. ال كريپتوبيرجالار حالىقارالىق قارجى ورتالىعىندا ورنالاسادى جانە سونىڭ اياسىندا عانا جۇمىس ىستەيدى. سەبەبى قازاقستاندا كريپتوۆاليۋتامەن تولەم جاساۋعا تىيىم سالىنعان.
بۇدان بولەك، ماينەرلەر تابىستىڭ 75 پروسەنتىن وتاندىق كريپتوبيرجالاردا ايىرباستاۋعا مىندەتتەلەدى. بۇل تالاپ 2024 جىلدان باستاپ ەنگىزىلەدى. قولدانىستاعى سالىقتان بولەك ماينەرلەردىڭ سىياقىسىنا قوسارلانعان قۇن سالىعى، ماينينگ پۋلدىڭ تابىس سالىعى، سونداي-اق كريپتوبيرجاداعى وپەراسيالار ءۇشىن تولەم الىنادى.
سەناتتا زاڭدى تالقىلاۋ بارىسىندا تاعى بىرنەشە وزگەرىس ەنگىزىلدى. ولار:
سيفرلىق ماينينگ جونىندەگى قىزمەتتى جۇزەگە اسىرۋعا ارنالعان ليسەنزيالاردىڭ كىشى تۇرلەرىنىڭ اتاۋلارىن ناقتىلاۋ؛
سيفرلىق ماينەردىڭ قىزمەتىن جارنامالاۋعا قاتىستى نورمالاردى الىپ تاستاۋ، ويتكەنى ولار «جارناما تۋرالى» زاڭدا جانە اكىمشىلىك قۇقىقبۇزۋشىلىق تۋرالى كودەكستە كوزدەلگەن؛
زاڭ نورمالارىن قولدانىسقا ەنگىزۋ مەرزىمدەرىن ناقتىلاۋ.
ءماجىلىس وسى وزگەرىستەردى قابىلداعاننان كەيىن زاڭ بىردەن پرەزيدەنتتىڭ قول قويۋىنا جىبەرىلەدى.
بەيرەسمي مالىمەتكە سايكەس، حالىقارالىق كريپتوبيرجالاردا ءبىر ميلليوننان استام قازاقستان ازاماتى تىركەلگەن. بارلىعى كريپتوۆاليۋتانى ساۋدالايدى. ونى سۇر سحەمالار ارقىلى ايىرباستاۋ فاكتىلەرى دە جوق ەمەس.
ال جاڭا زاڭ بويىنشا كريپتوبيرجالار مەملەكەتتىك كىرىستەر كوميتەتىنىڭ اقپاراتتىق جۇيەلەرىمەن ينتەگراسيالانادى. ماينينگكە قاجەتتى قۇرال-جابدىقتاردىڭ رەەسترى دە ەنگىزىلەدى. سونىڭ ارقاسىندا زاڭسىز داتا-ورتالىقتاردى بارىنشا ازايتۋعا بولادى.