جاڭا مينيسترلەر كابينەتى جاساقتالادى.
سەنات ءتوراعاسى ماۋلەن اشىمبايەۆ مەملەكەت باسشىسىنىڭ كەلەسى جىلى اۋقىمدى كادرلىق وزگەرىس بولاتىنى تۋرالى مالىمدەمەسىنە قاتىستى پىكىر ءبىلدىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتەيىك، 12 جەلتوقساندا ق ر پرەزيدەنتى قاسىم-جومارت توقايەۆ 2023 جىلى ورتالىقتا جانە جەرگىلىكتى جەردە اۋقىمدى كادرلىق وزگەرىس جاسالاتىنىن ايتتى.
وسى ورايدا م. اشىمبايەۆ مەملەكەت باسشىسى قاسىم-جومارت توقايەۆ ۇكىمەتكە الەۋمەتتىك، ينفراقۇرىلىم ماسەلەلەرى، ەكونوميكالىق ءوسىم، كاسىپكەرلىكتى قولداۋ جانە باسقا دا سالالار بويىنشا تاپسىرمالار بەرگەنىن ەسكە سالدى. بۇل تۇرعىدا ۇكىمەت بارلىق تاپسىرمالاردى ورىنداۋعا، ەلدەگى ساياسي، ەكونوميكالىق جانە الەۋمەتتىك رەفورمالاردى ودان ءارى جۇزەگە اسىرۋعا، سونداي-اق پرەزيدەنتتىڭ سايلاۋ الدىنداعى باعدارلاماسىن ورىنداۋعا نازار اۋدارۋى كەرەك.
«سوندىقتان اتقاراتىن قىزمەتىنە كىم لايىق ەكەنىن نەمەسە كىم جۇمىسىن ورىنداي الادى دەگەن باعا بەرۋىم ورىنسىز بولار. باعالاۋ جانە شەشىم قابىلداۋ – مەملەكەت باسشىسىنىڭ قۇزىرەتى. پرەزيدەنت ۇكىمەتتىڭ كەڭەيتىلگەن وتىرىسىندا تۇيتكىلدى ماسەلەلەردى دە اتاپ ءوتتى. بۇدان ءارى مەملەكەت باسشىسى جۇمىسىن ءتيىستى دەڭگەيدە اتقارا الاتىنداردى باعالاپ، ءتيىستى شەشىم قابىلدايدى دەپ ويلايمىن»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
سونىمەن قاتار ول 2023 جىلدىڭ ءبىرىنشى جارتىجىلدىعىندا ءماجىلىستى سايلاۋ جوسپارلانىپ وتىرعانىن ايتتى. قولدانىستاعى زاڭناماعا سايكەس، بۇل سايلاۋ وتكەننەن كەيىن، ۇكىمەت وتستاۆكاعا كەتىپ، جاڭا مينيسترلەر كابينەتى جاساقتالادى.
«بۇل تۇرعىدا پارلامەنتتە ناقتى مينيسترلەر مەن ۇكىمەت مۇشەلەرى لاۋازىمدارىنا ۇمىتكەرلەر تالقىلانادى. وسى ورايدا كىمنىڭ قالىپ، كىمنىڭ جۇمىسىن جالعاستىراتىنى ولاردىڭ تيىمدىلىگىنە، اتقاراتىن جۇمىستارىنا بايلانىستى بولادى. مەملەكەت باسشىسى ءتيىستى باعاسىن بەرەدى دەپ ويلايمىن. ءماجىلىس سايلاۋىنان كەيىن ءتيىستى وزگەرىستەر بولۋى مۇمكىن. ءبىراق بۇل وزگەرىستەر مەملەكەت باسشىسىنىڭ قۇزىرەتىنە جاتادى»، - دەدى سەنات ءتوراعاسى.