سەنات دەپۋتاتىنىڭ ءبىر ورنىنا 6 ادامنان ۇمىتكەر. بۇل تۋرالى ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ ايتتى، دەپ حابارلايدى قازاقپارات ءتىلشىسى.
«وسى جىلدىڭ 29 قاراشاسى مەن 14 جەلتوقسانى ارالىعىندا پارلامەنت سەناتى دەپۋتاتتىعىنا 130 كانديدات ۇسىنىلدى. وسىلايشا، باسەكەلەستىك 1 دەپۋتات ورنىنا 6 ادامنان استامدى قۇرايدى. وڭىرلەر اراسىندا اباي، باتىس قازاقستان، قىزىلوردا وبلىستارىندا ۇسىنىلعان كانيداتتاردىڭ سانى باسىم – 8 ادامنان، استانا مەن الماتىدا – 10 ادامنان. ەڭ از ۇمىتكەر اقمولا، اقتوبە، شىعىس قازاقستان، الماتى، جامبىل، قوستاناي، پاۆلودار، سولتۇستىك قازاقستان وبلىستارىندا ۇسىنىلدى – 5 ادامنان. شىمكەنت قالاسىندا ءبىر ورىنعا 6 كانديدات ۇمىتكەر»، - دەدى ول بۇگىن ورتالىق سايلاۋ كوميسسياسىنىڭ وتىرىسىندا.
ونىڭ دەرەگىنشە، كانديداتتاردىڭ ورتاشا جاسى - 50،5 جاس. ەڭ جاس كانديدات اقتوبە وبلىسىندا – 30 جاس. ال ەڭ جاسى ۇلكەنى باتىس قازاقستان وبلىسىندا – 74 جاستا. كانديداتتاردىڭ 25 پايىزى، ياعني 130 ادامنىڭ 33ء-ى - ايەل.
«قازىرگى ۋاقىتتا كانديداتتاردى تىركەۋ پروسەسى ءجۇرىپ جاتىر. ول 24 جەلتوقسانعا دەيىن جالعاسادى. بۇگىنگە دەيىن سايلاۋ كوميسسيالارى 49 كانديداتتى تىركەدى. باسەكەلەستىك بارلىق وڭىردە بار. سەنات دەپۋتاتتىعىنا كانديداتتاردى تىركەۋ قورىتىندىسى كۇنتىزبەلىك جوسپارعا سايكەس جەكە وتىرىسىمىزدا قارالادى. تىركەۋ كەزەڭى 24 جەلتوقسان كۇنى جەرگىلىكتى ۋاقىت بويىنشا ساعات 18.00-دە اياقتالادى»، - دەدى كونستانتين پەتروۆ.