قاسىم-جومارت توقايەۆتىڭ ساياساتى دۇرىس.
قازاقستان جۋرناليستەر وداعىنىڭ ءتوراعاسى سەيتقازى ماتايەۆ پرەزيدەنت سايلاۋىنا قاتىستى ءوز ويىمەن ءبولىسىپ، كىمگە جانە نە ءۇشىن داۋىس بەرگەنىن ايتتى، دەپ حابارلايدى Almaty-akshamy.kz.
"سايلاۋعا باردىم. ءوز تاڭداۋىمدى جاساپ، داۋىسىمدى قاسىم-جومارت توقايەۆقا بەردىم. ويتكەنى، ونىڭ باسەكەلەستەرى السىزدەۋ بولدى، تاڭداۋ بولمادى. قاسىم-جومارت كەمەلۇلىن كوپتەگەن جىلدار بويى، 1991 جىلدان، ول سىرتقى ىستەر ءمينيسترىنىڭ ءبىرىنشى ورىنباسارى بولعان كەزىنەن باستاپ بىلەمىن. مەن ول كەزدە پرەزيدەنتتىڭ باسپا ءسوز حاتشىسى بولاتىنمىن. كەيىن ول سەنات سپيكەرى، بۇۇ باس حاتشىسىنىڭ ورىنباسارى قىزمەتىنە اۋىستى.
نەگىزىندە، قاسىم-جومارت توقايەۆتىڭ ساياساتى دۇرىس. مەن سايلاۋ كۇنى تەلەمارافوندى كورىپ، ساياسي ناۋقاننىڭ بارىسىن ءجىتى باقىلاپ وتىردىم. حالىق مەملەكەت باسشىسىنىڭ دۇرىس شەشىم قابىلداعانىنا سەنىمدى بولۋى كەرەك. ءقازىر پرەزيدەنتتىڭ اتىنا وتە كوپ سىن ايتىلادى، ءبىراق ونىڭ بارلىعىن ادام بالاسى قابىلداي المايدى. سوندىقتان وعان بارلىق رەفورمالارىن جۇزەگە اسىرۋعا ۋاقىت پەن مۇمكىندىك بەرۋ كەرەك. بىزگە بارلىعىنا سابىرمەن قاراۋ كەرەك. ويتكەنى، سابىر – جەتىستىككە قول جەتكىزۋدىڭ سىرلى كىلتى.
مەملەكەت باسشىسى ءبىرىنشى كەزەكتە سوت رەفورماسىن جۇرگىزۋى كەرەك دەپ سانايمىن. ويتكەنى، ادىلەتسىز ايىپتاۋ مەن جالعان جالادان كوپتەگەن ادامدار زارداپ شەگەدى. تەرگەۋ ادىلەتتى جانە بەيتاراپ بولۋى كەرەك. الاياقتىق پەن بۇرمالاۋشىلىقتىڭ سالدارىنان جازىقسىز جاپا شەگۋ ادام جۇرەگىنە شەمەن بوپ قاتپاسا، مايداي جاقپايدى. ءبىز مۇنى ۇلىمىز ەكەۋمىز ءوز باسىمىزدان وتكەردىك.
«ب ا ق تۋرالى» زاڭعا وزگەرىستەر ەنگىزىلەدى دەپ كۇتىلۋدە. ولار جۋرناليستەر قاۋىمداستىعىمەن بەلسەندى تۇردە تالقىلانىپ، قولداۋ الۋى كەرەك. الدىڭعى زاڭ ب ا ق وكىلدەرىمەن بىرگە تالقىلانعان جوق. ءبىراق ونى شەنەۋنىكتەر، باسپاسوزگە قاتىسى جوق ادامدار توبى قابىلدادى.
مەن الداعى پارلامەنتتىك سايلاۋدى اسىعا كۇتەمىن جانە ونىڭ قىزىقتى وتەتىنىنە سەنىمدىمىن"، - دەدى سەيتقازى ماتايەۆ.