فينليانديا پرەمەر-مينيسترى تانىمال ادامدارمەن بىرگە كەشتە كوڭىل كوتەرىپ جۇرگەن ۆيدەوسى جەلىدە تاراعاننان كەيىن بۇكىل كۇدىكتەن ارىلۋ جانە وسەك-اياڭدى توقتاتۋ ءۇشىن ەسىرتكىگە سىناق تاپسىرۋ جونىندە شەشىم قابىلدادى، دەپ حابارلايدى Almaty-akshamy.kz Inform.kz-كە سىلتەمە جاساپ.
كەي ساياساتكەرلەر ساۋىق كەشىنىڭ ءدۇبىرلى وتۋىنە قاراعاندا، ونداعى كەيبىر قوناقتار ەسiرتكi قولدانۋى مۇمكiن دەگەن بولجام جاسادى.
جۇما كۇنى حەلسينكيدە وتكەن باسپا ءسوز كونفەرەنسياسىندا 36 جاستاعى ساننا مارين سىناقتان وتكەنىن جانە قورىتىندىسى كەلەسى اپتادا شىعاتىنىن ايتتى.
سونىمەن بىرگە ول ەشقاشان ەسىرتكى قولدانباعانىن تاعى دا ناقتىلادى.
مارين جينالعان جۋرناليستەرگە:
«مەن ەشقانداي زاڭسىز ارەكەت جاساعان جوقپىن. ەسىرتكىنى ءتىپتى جاس كەزىمدە دە قولدانىپ كورگەن ەمەسپىن»، - دەدى.
سونداي-اق جۋرناليستەر 2019 جىلدىڭ قاڭتارىنان بەرى قىزمەت ەتىپ كەلە جاتقان پرەمەر-مينيستردەن «ەگەر الگى كەشتە تەز ءارى جاۋاپتى ۇكىمەت شەشىمىن قابىلداۋ قاجەت بولسا، قابىلداي الا ما ەدىڭىز؟» دەپ سۇرادى.
«تىم بولماسا ءبىر رەت بولسىن، ءتۇن ورتاسىندا مەملەكەتتىك كەڭەس سارايىنا شۇعىل بارۋعا ءماجبۇر بولعان كەزىم ەسىمدە جوق. مەن ءوز جۇمىسىمدى تيىسىنشە اتقارىپ كەلەمىن، كەشتەرگە بارعان كەزدەرىمدە ەشقانداي جينالىس بولعان ەمەس»، - دەپ جاۋاپ بەردى ول.
ءماريننىڭ ايتۋىنشا، ول ءوزىن ۆيدەوعا ءتۇسىرىپ جاتقانىن كورگەن، ءبىراق ونىڭ جەلىدە جاريالانعانىنا قاپا بولعان.
«مەنى ادامدار دۇرىس تۇسىنەدى دەپ سەنگىم كەلەدى، ءارقايسىمىزدا جۇمىس ۋاقىتىنا دا، دەمالۋعا دا ۋاقىت بار»، - دەپ قوستى ول.