ساۋلە وماروۆا اقش بانكتەرىن باقىلاۋشى العاشقى ايەل بولۋى مۇمكىن

بۇدان بۇرىن قازاق قىزىنىڭ امەريكا قارجىسىن باسقارۋى مۇمكىن ەكەنىن جازعانبىز.

قازاقستان تۋماسى، كورنەل ۋنيۆەرسيتەتىنىڭ بانك قۇقىعى پروفەسسورى  ساۋلە وماروۆانى اقش پرەزيدەنتى دجو بايدەن اقش-تاعى بانك سەكتورىنىڭ نەگىزى رەتتەۋىشى - اقشا اينالىمىن باقىلاۋ باسقارماسىنىڭ باسشىسى (Office of the Comptroller of the Currency، OCC) ەتىپ تاعايىنداماق، دەپ حابارلايدى Almaty-akshamy.kz

بۇل تۋرالى جازعان Bloomberg اقپارات اگەنتتىگىنىڭ مالىمەتىنە قاراعاندا، وماروۆانىڭ رەسمي كانديداتۋراسى وسى اپتادا ۇسىنىلۋى مۇمكىن. ەگەر ول وسى قىزمەتكە بەكىتىلسە، 1863 جىلى نەگىزى قالانعان بانك رەتتەۋىشىن باسقاراتىن العاشقى ايەل بولماق.

OCC - اقش قارجى مينيسترلىگىنىڭ تاۋەلسىز بولىمشەسى. رەتتەۋشى 1200 تريلليون دوللارلىق اكتيۆتەرى بار 14 بانكتى باقىلايدى، بۇل اقش-تىڭ بانك جۇيەسىنىڭ بارلىق اكتيۆتەرىنىڭ ۇشتەن ەكىسىن قۇرايدى.

ساۋلە وماروۆا – قازاقستاننىڭ تۋماسى، قارجى سەكتورىن رەتتەۋگە جانە قارجى مەن ەكونوميكاعا مامانداندىرىلعان زاڭ پروفەسسورى جانە نيۋ-يورك ادۆوكاتتار القاسىنىڭ مۇشەسى.

1989 جىلى ماسكەۋ مەملەكەتتىك ۋنيۆەرسيتەتىن، 1999 جىلى Wisconsin ۋنيۆەرسيتەتىن ءبىتىرىپ، 2001 جىلى Northwestern ۋنيۆەرسيتەتىنىڭ زاڭ فاكۋلتەتىندە زاڭ عىلىمدارىنىڭ دوكتورى اتانعان. ءقازىر كورنەلل ۋنيۆەرسيتەتىنىڭ پروفەسسورى.

ول دجوردج بۋشتىڭ جانىنداعى اقش قارجى مينيسترلىگىندەگى رەتتەۋشى ساياسات جونىندەگى ارنايى كەڭەسشى بولعان، وعان دەيىن بەس جىل Davis Polk & Wardwell زاڭ فيرماسىندا جۇمىس ىستەگەن.