الماتىدا ءوتىپ جاتقان رەفەرەندۋمدا قازاقستاننىڭ ەڭبەك سىڭىرگەن قايراتكەرى، جازۋشى ساۋلە دوسجان ءوز داۋىسىن بەردى. ول №112 رەفەرەندۋم ۋچاسكەسىنە كەلىپ، ەل بولاشاعى ءۇشىن ماڭىزدى تاڭداۋدى جاساۋعا اتسالىستى.
— مەن بۇگىن ءوز ازاماتتىق پارىزىمدى ورىنداپ، داۋىس بەردىم. شىندىعىن ايتسام، بۇل رەفەرەندۋم ەلىمىزدە ەڭ كوپ تالقىلانعان ناۋقاننىڭ ءبىرى بولدى. ءقازىر حالىق ءوز پىكىرىن ەركىن بىلدىرۋدە. باتىس ەلدەرىندە جىلىنا 14-16 رەفەرەندۋم ءوتىپ جاتادى ەكەن، بىزگە بۇل تاڭعالارلىق نارسە بولماۋى ءتيىس. سەبەبى ولار ءاربىر زاڭدى حالىقتىڭ تالقىلاۋىنا ۇسىنادى، ال حالىق تا ەرىنبەي ءوز قۇقىعىن پايدالانىپ داۋىس بەرەدى. ءبىز دە سولاي جاساۋىمىز كەرەك. رەفەرەندۋمعا قاتىسىپ، ءوز پىكىرىمىزدى ءبىلدىرۋ — ازاماتتىق مىندەتىمىز، — دەدى ساۋلە دوسجان.
جازۋشى بۇل رەفەرەندۋمنىڭ ەل ءۇشىن ماڭىزدىلىعىن اتاپ ءوتىپ، ءاربىر قازاقستاندىقتى بەلسەندى تۇردە قاتىسۋعا شاقىردى. ونىڭ ايتۋىنشا، حالىقتىڭ سانالى تاڭداۋى ەلىمىزدىڭ دامۋ باعىتىن انىقتايدى، سوندىقتان ءار ازامات ءوز داۋىسىن بەرىپ، ەل بولاشاعىنا ءوز ۇلەسىن قوسۋى ءتيىس.
الماتىلىقتار تاڭەرتەڭنەن باستاپ بەلسەندى تۇردە داۋىس بەرىپ جاتىر. قالانىڭ ءارتۇرلى رەفەرەندۋم ۋچاسكەلەرىندە جوعارى بەلسەندىلىك بايقالىپ، تۇرعىندار ءوز تاڭداۋلارىن جاساۋعا جاۋاپكەرشىلىكپەن قاراۋدا.