الەمدىك نارىققا 125 مىڭ توننا مۇناي شىعۋى مۇمكىن
ناۋرىزدا باكۋ-تبيليسي-جەيحان (بتج) مۇناي قۇبىرى باعىتى بويىنشا قازاقستاندىق مۇناي ءترانزيتىنىڭ جالپى كولەمى شامامەن 27 مىڭ توننانى قۇرايدى، ال ءساۋىر ايىنان باستاپ بىرنەشە ەسە وسەدى دەپ كۇتىلۋدە، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتۋ كەرەك، ونىڭ 20 مىڭ تونناسى تەڭىز كەنىشىندەگى مۇنايدىڭ ەكى پارتياسى بولسا، 7 مىڭ تونناسى - قاشاعاننان الىنعان سىناق پارتياسى.
«قازمۇنايگازدىڭ» مالىمەتىنشە، ساۋىردە تەڭىزدەن كاسپيي تەڭىزى مەن بتج ارقىلى الەمدىك نارىققا 125 مىڭ توننا مۇناي شىعۋى مۇمكىن، دەپ جازدى Turan اگەنتتىگى.
بۇل رەتتە قاشاعانمەن مۇناي بويىنشا كەلىسسوزدەر جۇرگىزىلۋدە.
SOCAR Midstream Operations (SOCAR-نىڭ ەنشىلەس كاسىپورنى) تۇسىندىرمەسىنە سۇيەنسەك، قازاقستاندىق مۇنايدى بتج ارقىلى تاسىمالداۋ SOCAR مەن «قازمۇنايگاز» اراسىندا جاسالعان جانە جىلىنا 1،5 ميلليون مۇناي ءترانزيتىن قاراستىراتىن كەلىسىم نەگىزىندە جۇزەگە اسىرىلادى.
2023 جىلدىڭ سوڭىنا دەيىن بتج ارقىلى قازاقستان مۇنايىنىڭ كاسپيي تەڭىزى ارقىلى ءترانزيتى ءۇشىن اقتاۋدان سانعاشال تەرمينالىنا دەيىن 12-14 تانكەر رەيسى جوسپارلانعان.
قازىرگى ۋاقىتتا بتج مۇناي قۇبىرى ارقىلى ازەربايجان-چيراگ-گۇنەشلي كەن ورىندارى بلوگىنىڭ مۇنايى مەن شاح-دەنيز كەن ورنىنىڭ كوندەنساتى، سونداي-اق تۇركىمەنستان مەن قازاقستاننىڭ مۇنايى ايدالادى.