قازاقستاندىق سپورتشى بيىل قاتارىنان 12ء-ىنشى جەڭىسىنە قول جەتكىزدى
قازاقستاننىڭ ءبىرىنشى، الەمنىڭ 7-راكەتكاسى ەلەنا رىباكينا سپورتتىق جولىندا العاش رەت مايامي WTA 1000 ءتۋرنيرىنىڭ جارتىلاي فينالىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستاندىق تەننيسشى شيرەك فينالدا الەمنىڭ 24-راكەتكاسى، يتاليالىق مارتينا تريەۆيزانمەن شەبەرلىك بايقاستى.
قارسىلاستار وسىعان دەيىن بىر-بىرىمەن كەزدەسپەگەن ەدى.
الەمنىڭ 1-راكەتكاسى، پولشا وكىلى يگا شۆەنتەك جاراقاتىنا بايلانىستى مايامي ماستەرس تۋرنيرىنە قاتىسۋدان باس تارتقاننان كەيىن يتاليالىق تەننيسشىنىڭ جارىس بارىسىندا جولى بولعانداي ەدى. ءبىراق ونىڭ ءتورتىنشى اينالىمدا الەمنىڭ 22-راكەتكاسى، 2017 جىلعى رولان گارروس ءتۋرنيرىنىڭ چەمپيونى، لاتۆيالىق ەلەنا وستاپەنكونى جەڭىپ كەتۋى م.تريەۆيزاننىڭ وڭاي شاعىلاتىن جاڭعاق ەمەستىگىن تانىتتى.
ءبىرىنشى پارتيادا ەسەپ 1:1 بولعان مەزەتتە ە.رىباكينا قارسىلاسىنىڭ برەيك جاساۋىنا مۇمكىندىك بەرمەي، ءوزى سونداي ءساتتى قۇر جىبەرمەدى – 3:1. دەگەنمەن م.تريەۆيزان دا قاراپ قالماي، برەيكپەن ەسەپتى قىسقارتقانىمەن، ەلەنا سول بويدا قارىمتا قايىردى – 5:3. سودان كەيىن سەتكە دوپ بەرگەندە، قاتەلەسكەن جوق – 6:3.
قازاقستاندىق تەننيسشى ەكىنشى سەتتى برەيكپەن باستاپ، بەت قاراتپادى – 6:0.
ءبىر ساعات 10 مينۋتقا سوزىلعان باسەكە بارىسىندا ە.رىباكينا 10 ەيس جاساپ، 9 برەيك-پوينتتىڭ بەسەۋىن ءوز پايداسىنا جازدى. قارسىلاسى 1 برەيكپەن (4 برەيك-پوينت) عانا كوزگە ءتۇستى.
وسىلايشا، قازاقستاندىق سپورتشى بيىل قاتارىنان 12ء-ىنشى جەڭىسىنە قول جەتكىزدى.
ەلەنا رىباكينا فينالعا شىعۋ ءۇشىن الەمنىڭ 3-راكەتكاسى، امەريكالىق دجەسسيكا پەگۋلا نەمەسە رەيتينگتە 26-ساتىداعى رەسەيلىك اناستاسيا پوتاپوۆانىڭ بىرەۋىمەن تالاسادى.