2024 جىلعى ساۋىردە ەلەكتروندىق ەڭبەك بيرجاسىندا Enbek.kz 90،3 مىڭ بوس جۇمىس ورنى جانە 108،9 مىڭ تۇيىندەمە ورنالاستىرىلدى.
الدىڭعى ايمەن سالىستىرعاندا بوس ورىندار سانى 20%-عا، تۇيىندەمەلەر سانى 35%-عا ءوستى. بۇل رەتتە سۇرانىستىڭ جارتىسى ورتا بىلىكتى قىزمەتكەرلەرگە تيەسىلى بولدى، دەپ حابارلايدى Almaty-akshamy.kz سالا مينيسترلىگىنە سىلتەمە جاساپ.
ناۋرىز ايىمەن سالىستىرعاندا ءساۋىر ايىندا ەڭبەك نارىعىنداعى بەلسەندىلىكتىڭ ماۋسىمدىق وسۋىنە بايلانىستى جۇمىسكەرلەردى ىزدەۋ مەن جالداۋدىڭ ءوسۋ تەندەنسياسى بايقالدى. اسىرەسە ورتا بىلىكتى جۇمىسشىلارعا سۇرانىس ارتتى، بۇل ساناتقا ءاربىر ەكىنشى بوس ورىن (49% نەمەسە 44،1 مىڭ بىرلىك) تيەسىلى. ۇسىنىس تاراپىنان بىلىكتىلىگى جوق قىزمەتكەرلەردەن تۇيىندەمە سانى ەڭ كوپ – 11،7 مىڭعا نەمەسە 34،2 مىڭعا دەيىن ءوستى. سونىمەن قاتار، جوعارى بىلىكتى كادرلاردىڭ سۇرانىسى مەن ۇسىنىسى سالىستىرمالى تەپە-تەڭدىكتە – شامامەن 28% ساقتالدى.
ەڭ كوپ بوس جۇمىس ورىندارىن ءبىلىم بەرۋ (17،9 مىڭ بوس جۇمىس ورنى)، باسقا دا قىزمەت تۇرلەرى (11 مىڭ)، دەنساۋلىق ساقتاۋ (10 مىڭ)، سونداي-اق قۇرىلىس (8،2 مىڭ) سالالارىنىڭ كاسىپورىندارى ورنالاستىردى.
«وڭىرلەر بويىنشا الماتى قالاسىن (-322 بوس ورىن) قوسپاعاندا، ەڭ جوعارى بولعان اقمولا (53% - عا، 3 مىڭنان 4،6 مىڭعا دەيىن) جانە جامبىل (50% - عا، 3،6 مىڭنان 5،4 مىڭعا دەيىن) وبلىستارىندا بوس ورىندار سانىنىڭ ءوسۋى بايقالادى. بۇل رەتتە اتالعان وڭىرلەردە سۇرانىستىڭ ءوسۋى نەگىزىنەن جۇمىسشى، اۋلا سىپىرۋشى، جۇك تيەۋشى جانە ت.ب. سياقتى بىلىكتىلىگى جوق لاۋازىمدارعا قالىپتاستى»، – دەدى «ەڭبەك رەسۋرستارىن دامىتۋ ورتالىعى» اق ستراتەگيا جانە ۇلكەن دەرەكتەردى تالداۋ دەپارتامەنتىنىڭ ديرەكتورى باقتيار جازىقپايەۆ.
تۇيىندەمەگە كەلەتىن بولساق، بارلىق اۋماقتاردا ولاردىڭ ساندىق ءوسۋى بايقالادى. بۇل رەتتە ءساۋىر ايىندا ەڭ كوپ ءوسىمدى باتىس قازاقستان (69%-عا، 3،4 مىڭنان 5،8 مىڭعا دەيىن)، تۇركىستان (62%-عا، 10 مىڭنان 16،2 مىڭعا دەيىن) جانە شىعىس قازاقستان (54% - عا، 2،5 مىڭنان 3،8 مىڭعا دەيىن تۇيىندەمە) وبلىستارى كورسەتتى.
«بىلىكتىلىگى جوق جۇمىسشىلارمەن قاتار، ەڭ سۇرانىسقا يە ماماندىقتار: اۆتوموبيل جۇرگىزۋشىسى (2 مىڭ بوس ورىن)، تاربيەشى (1،6 مىڭ) جانە كۇزەتشى (1،6 مىڭ) بولدى. بۇل رەتتە جاسىل جەلەك وتىرعىزۋ جانە جاسىل ايماقتاردى اباتتاندىرۋ بويىنشا جۇمىسشىلاردىڭ (+521 بوس جۇمىس ورنى)، ورمان مونتاجشىلارىنىڭ (+502)، سونداي-اق جول جۇمىسشىلارىنىڭ (+349) سۇرانىسى ارتتى»، - دەپ ءبولىستى باقتيار جازىقپايەۆ.
ءوتىنىش بەرۋشىلەردىڭ گەندەرلىك قۇرىلىمى وتكەن ايدا وزگەرگەن جوق – ەرلەر مەن ايەلدەردىڭ بىردەي سانى جۇمىس ىزدەدى.
جاس توپتارى بويىنشا تۇيىندەمەلەر سانىنىڭ ءوسۋى تۇتاستاي العاندا بىركەلكى بولدى. ءساۋىر ايىنىڭ قورىتىندىسى بويىنشا ىزدەنۋشىلەردىڭ جالپى سانىنان 28% – 45 جاستان اسقان ادامدار، 27% – 35 پەن 44 جاس ارالىعىنداعى ادامدار، ال ىزدەنۋشىلەر اراسىندا جاستاردىڭ ۇلەسى (18-35 جاس) 45% قۇرادى. بۇل رەتتە 45-55 جاس ارالىعىنداعى (19%) جانە 35-40 جاس ارالىعىنداعى (16%) ىزدەنۋشىلەر تۇيىندەمەنى نەعۇرلىم بەلسەندى ورنالاستىردى، ال ءاربىر ونىنشى تۇيىندەمەنى زەينەتكەرلىك جاسقا دەيىنگى ادامدار ورنالاستىردى.
ءساۋىر ايىنىڭ قورىتىندىسى بويىنشا وڭدەۋ ونەركاسىبىندەگى سەح شەبەرى (ورتا ەسەپپەن 1،3 ملن تەڭگەدەن باستاپ)، ازىرلەۋ جونىندەگى جوبالار باسشىسى (951 مىڭ تەڭگەدەن باستاپ)، سونداي-اق كوممەرسيالىق ۇيىمداردىڭ قۇرىلىمدىق بولىمشەلەرىنىڭ باسشىسى (~900 مىڭ تەڭگە) لاۋازىمدارىنا ۇمىتكەر ىزدەنۋشىلەر ەڭ جوعارى جالاقىنى كۇتتى. ءوز كەزەگىندە جۇمىس بەرۋشىلەر ۇڭعىمالاردى بۇرعىلاۋ جۇمىستارى بويىنشا شەبەرلەر (~ 750 مىڭ تەڭگە)، باس پروديۋسەرلەر (~711 مىڭ تەڭگە) جانە اۆياسياداعى ينجەنەرلەر (~701 مىڭ تەڭگە) ءۇشىن ەڭ ۇلكەن جالاقى مولشەرىن ۇسىندى.
وسىلايشا، Enbek.kz دەرەكتەرى بويىنشا، ءساۋىر ايىندا ەڭبەك نارىعىندا ىزدەۋ جانە جالداۋ ۇدەرىسى، اسىرەسە جارتىلاي بىلىكتى جۇمىسشىلار سەگمەنتىندەگى بەلسەندىلىكتىڭ ماۋسىمدىق ءوسۋى بايقالدى. بۇل رەتتە بارلىق بىلىكتىلىكتەگى جۇمىسكەرلەرگە سۇرانىس پەن ۇسىنىس تەپە-تەڭدىگى ساقتالدى.