ساۋدا جانە ينتەگراسيا ءمينيسترى ارمان شاققالييەۆ الماتىداعى ءىرى ساۋدا جەلىلەرىن ارالاپ، ساۋدا سۋبەكتىلەرىنىڭ وكىلدەرىمەن كەزدەستى، دەپ حابارلايدى aqshamnews.kz
كەزدەسۋ بارىسىندا دۇكەن سورەلەرىندەگى وتاندىق ونىمدەردىڭ ۇلەسىن ارتتىرۋ ماسەلەسى تالقىلاندى. مينيستر الماتىداعى ساۋدا جەلىلەرىنىڭ جالپى اسسورتيمەنتىنىڭ ەلەۋلى بولىگىن وتاندىق ونىمدەر قۇرايتىنىن اتاپ ءوتتى. الەۋمەتتىك ماڭىزى بار تاۋارلاردىڭ ىشىندە، اسىرەسە ءسۇت ونىمدەرىنىڭ ۇلەسى جوعارى ەكەنى ايتىلدى.
مىسالى، الماتىداعى دۇكەندەردە ءسۇت ونىمدەرىنىڭ 97%-ى قازاقستاندا وندىرىلگەن.
«ءبىز وتاندىق فەرمەرلەرمەن جانە وندىرۋشىلەرمەن تىعىز جۇمىس ىستەيمىز، ولاردىڭ ونىمدەرىن ساۋدا جەلىلەرىنە جەتكىزۋ ءۇشىن بار كۇشىمىزدى سالىپ جاتىرمىز. ءىرى ساۋدا جەلىلەرىندەگى كوكونىستەردىڭ بارلىعى قازاقستاندىق فەرمەرلەردىڭ ءونىمى. سونىمەن قاتار، قۇس ەتى مەن وسىمدىك مايى سياقتى باسقا دا الەۋمەتتىك ماڭىزى بار ونىمدەردىڭ ۇلەسىن ارتتىرۋ وتە ماڭىزدى قادام بولىپ تابىلادى»، – دەدى مينيستر.
وتاندىق وندىرۋشىلەردى قولداۋ ماقساتىندا مينيستر ءبىرقاتار بەكىتىلگەن مىندەتتەمەلەر تۋرالى مالىمدەدى. اتاپ ايتقاندا، بارلىق وتاندىق ونىمدەرگە ارنايى «قازاقستاندا جاسالعان» دەگەن بەلگى قويۋ مىندەتتەلدى.
سونىمەن قاتار، ىشكى ساۋدانى قولداۋ فۋنكسياسىنىڭ زاڭنامالىق تۇردە ساۋدا مينيسترلىگىنە بەرىلۋى وتاندىق وندىرۋشىلەر ءۇشىن ۇلكەن مۇمكىندىك بولىپ تابىلادى. بۇل شارا مەملەكەتتىك قولداۋ العان ساۋدا وبەكتىلەرىنە سورە كەڭىستىگىن 20%-عا ارتتىرۋدى مىندەتتەيدى.
ەندى دۇكەن سورەلەرىنىڭ كەمىندە 50%-ى وتاندىق ازىق-تۇلىك ونىمدەرىمەن، ال كەمىندە 20%-ى تۇرمىستىق تاۋارلارمەن تولتىرىلۋى ءتيىس. بۇل تاۋارلار تۇتىنۋشىلار ءۇشىن كورنەكى ءارى قولجەتىمدى ورىنداردا ورنالاسۋى قاجەت.
«تۇتىنۋشىلاردى الداۋعا جول بەرمەۋ ءۇشىن ءبىز تاۋارلاردىڭ ساپاسى مەن ورنالاسۋىنا قويىلاتىن تالاپتاردى كۇشەيتتىك. مىسالى، ءسۇت ونىمدەرى ءسۇت سۋسىندارىمەن، ال ماي – مايدىڭ بالاما تۇرلەرىمەن قاتار تۇرماۋى قاجەت»، – دەپ اتاپ ءوتتى ارمان شاققالييەۆ.