ساۋالناما جۇرگىزىپ، سان سوعىپ قالماڭىز

سايلاۋعا قاتىستى ساۋالناما جۇرگىزگەن  بلوگەرلەر جاۋاپكەرشىلىككە تارتىلۋى مۇمكىن

جەكە تۇلعالارعا ولاي جاساۋعا بولمايدى. «ادال سايلاۋ ءۇشىن» شتابىنىڭ مۇشەلەرى وسىلاي دەدى. زاڭگەرلەردىڭ ايتۋىنشا، "سايلاۋ تۋرالى" زاڭدا كورسەتىلگەن نورمالار تەك مامانداندىرىلعان ۇيىمدارعا عانا ساۋالناما وتكىزۋگە رۇقسات بەرەدى. ورتالىق سايلاۋ كوميسسياسىن ەسكەرتپەي جۇرگىزىلگەن الەۋمەتتىك زەرتتەۋلەر زاڭسىز دەپ سانالادى، دەپ حابارلايدى Almaty-akshamy.kz 24.kz-كە سىلتەمە جاساپ. 

"ولاردىڭ ناتيجەسىن جاريالاۋ دا زاڭعا قايشى. سوندىقتان ميلليونداعان وقىرمانى بار بلوگەرلەر ءوز پاراقشاسىندا ساۋالناما ءوتزىپ، ناتيجەسىن جاريالاسا، ول الەۋمەتتىك زەرتتەۋ دەپ باعالانۋى مۇمكىن. سايكەسىنشە، مۇنداي ارەكەتتەر «سايلاۋ تۋرالى» زاڭعا قايشى"، - دەيدى زاڭگەر. زاڭدى بۇزعاندارعا 30 ايلىق ەسەپتىك كورسەتكىش تۇرىندە ايىپپۇل سالىنادى.

«زاڭدى تۇلعا وتكىزۋ كەرەك. ساۋالنامانى جەكە تۇلعا وتكىزە المايدى. ەكىنشىدەن، ول كەز كەلگەن زاڭدى تۇلعا ەمەس. ونىڭ بەس جىلدىق تاجىريبەسى بولۋ كەرەك وسى سالادا. ياعني، ساۋالنامانى 1-2 جىل تاجىربەسى بار زاڭدى تۇلعا وتكىزە المايدى. ودان كەيىن وسى زاڭدى تۇلعانىڭ تاجىريبەسى بار ءتيىستى قىزمەتكەرلەرى بولۋ كەرەك. وسىنىڭ بارلىعىن راستايتىن ولار قۇجاتتارىن ورتالىق سايلاۋ كوميسسياسىنا تاپسىرادى، وزدەرىنىڭ جازباشا حابارلاماسىندا»، - دەيدى  «ادال سايلاۋ ءۇشىن» رەسپۋبليكالىق قوعامدىق شتابىنىڭ مۇشەسى، زاڭگەر دۋمان جامپەيىسوۆ.