ساتىبالدى مەن بورانبايەۆتىڭ سىرتقا زاڭسىز شىعارىلعان اكتيۆتەرى قايتارىلا باستادى

ماماندار رەسمي مالىمەت بەردى.

ەكونوميكالىق رەسۋرستاردىڭ زاڭسىز شوعىرلانۋىنا قارسى ءىس-قيمىل ماسەلەلەرى جونىندەگى ۆەدومستۆوارالىق كوميسسيا سىرتقا زاڭسىز شىعارىلعان اكتيۆتەردى ەلگە قايتارۋ باعىتىندا اتقارىلعان شارۋالار تۋرالى رەسمي مالىمەت بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

 «كوميسسيا ەكونوميكالىق رەسۋرستاردى زاڭسىز شوعىرلاندىرۋعا قارسى ءىس-قيمىل ماسەلەلەرى بويىنشا تەرگەپ-تەكسەرۋ ورگاندارىنىڭ كۇش-جىگەرىن ۇيلەستىرۋدى قامتاماسىز ەتۋدە. ءىرى مولشەردە، ونىڭ ىشىندە شەتەلدە قىلمىستىق كىرىستى زاڭداستىرۋ بەلگىلەرى بار نەعۇرلىم رەزونانستىق ىستەردى تەرگەپ-تەكسەرۋ ەرەكشە باقىلاۋدا. بۇل - ق.ساتىبالدىۇلىنا، گ.ساتىبالدىعا، ق.بورانبايەۆقا، «وكم» ج ش س وپەراتورىنىڭ باسشىلارىنا قاتىستى جانە باسقا ىستەر.  قازىرگى ۋاقىتتا تەرگەپ-تەكسەرۋ ورگاندارى قابىلداعان شارالارمەن شامامەن 230 ملرد تەڭگە، ونىڭ ىشىندە ولاردى شەتەلدىك يۋريسديكسيالاردان قايتارۋ جولىمەن وتەلدى»، - دەپ جازىلعان كوميسسيانىڭ مالىمەتىندە. 

سونداي-اق، سىبايلاس جەمقورلىققا قارسى قىزمەت تەرگەپ-تەكسەرىپ جاتقان ءىس بويىنشا ايىپتالۋشىلار ليۋكسەمبۋرگتەن 170 ملن اقش دوللارىن ءوز ەركىمەن قايتارعانى ايتىلعان. 

«تەرگەپ-تەكسەرۋ ورگانى «قازاقتەلەكوم» اق، «كولىكتىك سەرۆيس ورتالىعى» اق جانە باسقا مۇلىكتى جىمقىرۋ ىستەرى بويىنشا شامامەن 36 ملرد تەڭگەنى وتەتتى. وكم وپەراتورى ءىسى بويىنشا شامامەن 180 ملرد تەڭگەنى جىمقىرۋدىڭ جولى كەسىلدى («وكم» ج ش س شوتىنان «جاسىل دامۋ» اق-نىڭ (مەملەكەتتىك ۇيىم، «وكم وپەراتورى» ج ش س اكسيالارىنىڭ 100%-ىنا يەلىك ەتەدى) شوتىنا اۋدارىلدى)، ونىڭ شامامەن 100 ملرد تەڭگەسى جەڭىلدىكتى اۆتونەسيەلەۋگە باعىتتالدى»، - دەلىنگەن رەسمي اقپاراتتا.