ادامنىڭ تابيعاتقا اسەرى بارعان سايىن جويقىندالا ءتۇسىپ وتىرعان قازىرگى الەمدە يۋنەسكو بىرەگەي مادەني جانە تابيعي مۇراسى بار ەرەكشە گەوپاركتەر قۇرۋدا. ال ءوزىنىڭ باي تابيعي جانە مادەني ارتۇرلىلىگىمەن تانىمال بولىپ وتىرعان قازاقستان وسى تابيعي رەسۋرستاردى ساقتاۋ جونىندەگى حالىقارالىق باستاماعا بەلسەندى تۇردە قاتىسۋدا، دەپ حابارلايدى aqshamnews.kz
وسى ۇدەرىستەگى تاعى ءبىر قادام – ساتبايەۆ ۋنيۆەرسيتەتىندە وتكەن «يۋنەسكو گەوپاركتەرى تۇراقتى دامۋ جانە ىنتىماقتاستىق ءۇشىن» اتتى حالىقارالىق گەوفورۋم بولدى، ول بۇۇ مەن يۋنەسكو-نىڭ دەمەۋشىلىگىمەن ءوتتى. فورۋمعا مادەني جانە تابيعي مۇرانى ساقتاۋ سالاسىندا جۇمىس ىستەيتىن ءارتۇرلى ەلدەردىڭ ماماندارى، قازاقستاننىڭ ۋنيۆەرسيتەتتەرى مەن ۇلتتىق ساياباقتارىنىڭ وكىلدەرى جينالىپ، دۇنيە جۇزىندەگى كەرەمەت اسەم تابيعي ورىنداردى دامىتۋ جونىندە تۇراقتى دامىتۋ باعدارلاماسى الدىندا تۇرعان سىن-قاتەرلەرگە قارسى تاجىريبەلەرىمەن جانە مىندەتتەرىمەن ءبولىستى.
بۇگىنگى تاڭدا يۋنەسكو-نىڭ جاھاندىق گەوپاركتەر باعدارلاماسى 48 ەلدەگى 190-نان استام نىساندى قامتيدى. «Geopark Aral» قازاقستان بويىنشا وسى باعدارلاماداعى العاشقى گەوپارك بولادى. ونىڭ نەگىزىن قالاۋشى – ارالدى قۇتقارۋ جونىندەگى حالىقارالىق قورى.
ءىس-شارا ساتبايەۆ ۋنيۆەرسيتەتىنىڭ قولداۋىمەن، قر-نىڭ يۋنەسكو جانە يسەسك ىستەرى جونىندەگى ۇلتتىق كوميسسياسىنىڭ باس حاتشىسى جانار شايمەنوۆانىڭ، قىزىلوردا وبلىسى اكىمىنىڭ ورىنباسارى ارداق زەبەشيەۆتىڭ، قازان فەدەرالدى ۋنيۆەرسيتەتىنىڭ وكىلدەرى جانە «يانگان-تاۋ» گەوپاركى جوبالاۋ توبىنىڭ، سونداي-اق حالىقارالىق ساراپشىلاردىڭ قاتىسۋىمەن ءوتتى.
بۇل گەوفورۋم گەوپاركتەردى زاڭنامالىق رەتتەۋدىڭ ماڭىزدى ماسەلەلەرىن، عىلىمي-زەرتتەۋ قۇزىرەتتىلىكتەرىن جانە تۇراقتى دامۋدى قالىپتاستىرۋداعى گەوپاركتەردىڭ ءرولىن تالقىلاۋدا، سونداي-اق گەوپاركتەردى قۇرۋ بويىنشا تاجىريبە الماسۋعا جانە تابيعي مۇرانى ساقتاۋ سالاسى بويىنشا حالىقارالىق ساراپشىلاردى وقىتۋعا ارنالعان عىلىمي-ساراپتامالىق الاڭ ءرولىن اتقاردى.
ساتبايەۆ ۋنيۆەرسيتەتى ءۇشىن فورۋم تۇراقتىلىق قاعيداتتارىنا نەگىزدەلگەن جوبالاردى قۇرۋ جانە جۇزەگە اسىرۋ بويىنشا جيناقتالعان تاجىريبەمەن الماسۋدىڭ تاعى ءبىر مۇمكىندىگى بولدى. جۇمىس سەسسيالارى مەن ەكىجاقتى كەڭەستەر بارىسىندا زاماناۋي ۋنيۆەرسيتەت جۇمىسىنداعى جاھاندىق كۇن ءتارتىبىن ەنگىزۋدەگى قيىندىقتاردى ەڭسەرۋ جولدارى، جوبالىق تاۋەكەلدەردى تالداۋ ادىستەرى جانە جاھاندىق باستامالاردى جۇزەگە اسىرۋعا قاۋىمداستىقتاردى تارتۋ ماسەلەلەرى تالقىلاندى. كەزدەسۋلەر ناتيجەسىندە ساتبايەۆ ۋنيۆەرسيتەتىنىڭ تۇراقتى دامۋ جونىندەگى جوبالىق كەڭسەسىنىڭ وكىلدەرى ىنتىماقتاستىق قارىم-قاتىناستى جالعاستىرۋعا جانە قازان مەن باشقۇرتستان ۋنيۆەرسيتەتتەرى ءۇشىن كەڭەيتىلگەن ۆەبينار ۇيىمداستىرۋعا كەلىستى.