ساتبايەۆ ۋنيۆەرسيتەتىندە ورتالىق ازيا ءبىلىم بەرۋدى اككرەديتتەۋ قاۋىمداستىعى (CAAAE) جانە ينجەنەرلىك ءبىلىم بەرۋدى اككرەديتتەۋ بويىنشا ەۋروپالىق جەلى (ENAEE) ۇيىمداستىرعان حالىقارالىق دەڭگەيدەگى ماڭىزدى ءىس-شارالار ءوتتى. وسى ءىس-شارالار اياسىندا «ENAEE جەلىسىنىڭ اككرەديتتەۋ اگەنتتىكتەرىنە قويىلاتىن تالاپتار» اتتى حالىقارالىق سەمينار جانە ENAEEء-نىڭ 29-شى باس اسسامبلەياسى ۇيىمداستىرىلدى.
اسسامبلەيا جۇمىسىنا اۆستريا، فرانسيا، يتاليا، يسپانيا، ۇلىبريتانيا جانە باسقا دا 15 ەلدەن كەلگەن 16 اككرەديتتەۋ اگەنتتىگىنىڭ باسشىلارى، سونداي-اق ينجەنەرلىك ءبىلىم بەرۋ ساپاسىن قامتاماسىز ەتۋ سالاسىنداعى قازاقستاندىق جانە حالىقارالىق ساراپشىلار قاتىستى.
جيىندى ساتبايەۆ ۋنيۆەرسيتەتىنىڭ رەكتورى مەيرام بەگەنتايەۆ قۇتتىقتاۋ سوزىمەن اشتى. ول ۋنيۆەرسيتەتتىڭ حالىقارالىق اككرەديتاسياعا قاتىسۋىنىڭ ماڭىزدىلىعىن اتاپ ءوتىپ، بۇل شارانىڭ وڭىردەگى ينجەنەرلىك ءبىلىم بەرۋ ساپاسىن ارتتىرۋعا، سونداي-اق بولاشاقتا ستۋدەنتتەردىڭ مانساپ جولىندا تابىسقا جەتۋىنە ىقپال ەتەتىنىنە سەنىم ءبىلدىردى. سونىمەن قاتار، رەكتور EUR-ACE اككرەديتاسياسىنىڭ ينجەنەرلەردى جوعارى دەڭگەيدە دايارلاۋدى قامتاماسىز ەتۋدەگى ماڭىزدىلىعىن ەرەكشە اتاپ ءوتتى.
ENAEE پرەزيدەنتى جوزە كارلوس كۆادرادو ءوز سوزىندە حالىقارالىق ىنتىماقتاستىقتى نىعايتۋ جانە ينجەنەرلىك ءبىلىم بەرۋ باعدارلامالارىن ەۋروپادا عانا ەمەس، باسقا ايماقتاردا دا دامىتۋ قاجەتتىگىن ايتتى. ول ەۋروپالىق وداق پەن ورتالىق ازيا اراسىنداعى ىنتىماقتاستىقتى كەڭەيتۋ ارقىلى ايماقتاعى ستۋدەنتتەرگە جاڭا مانساپتىق مۇمكىندىكتەر اشۋعا نازار اۋداردى.
پروفەسسور جوزە كارلوس كۆادرادو ورتالىق ازياداعى ينجەنەرلىك ءبىلىم بەرۋ باعدارلامالارىن اككرەديتتەۋدى جەتىلدىرۋگە باعىتتالعان ءىرى جوبالاردىڭ باستاماشىسى بولىپ تابىلادى. ENAEE ۇيىمداستىرعان ءىس-شارالار ءوز كەزەگىندە ەۋروپا مەن ورتالىق ازيا اراسىنداعى تاجىريبە الماسۋدى قامتاماسىز ەتەتىن جانە ينجەنەرلىك ءبىلىم بەرۋ ساپاسىن ارتتىرۋعا ارنالعان ماڭىزدى الاڭ رەتىندە قىزمەت ەتەدى.
بۇل كەزدەسۋلەر ينجەنەرلىك ءبىلىم بەرۋ سالاسىنداعى حالىقارالىق ستاندارتتاردى ەنگىزۋدى جانە ايماقتىق ىنتىماقتاستىقتى نىعايتۋدى كوزدەيتىن ماڭىزدى قادام بولدى.
