بۇگىن – قانىش ساتبايەۆتىڭ تۋعان كۇنى جانە قازاقستانداعى عىلىم قىزمەتكەرلەرىنىڭ كاسىبي مەرەكەسى. ايتۋلى داتاعا وراي ق ر پرەزيدەنتى جانىنداعى ۇلتتىق عىلىم اكادەمياسىنىڭ باستاماسىمەن عىلىم اكادەمياسى اۋلاسىندا «ساتبايەۆ ساكۋراسى» قايتا وتىرعىزىلدى. بۇل تۋرالى Aqshamnews.kz سايتى حابارلايدى.
ەكىنشى دۇنيەجۇزىلىك سوعىس كەزىندە عىلىم اكادەمياسىنىڭ عيماراتىن جاپون تۇتقىندارى سالعان. سول كەزدە اكادەميا باسشىسى قانىش ساتبايەۆ ولارعا قامقورلىق كورسەتىپ، ادامگەرشىلىك تانىتقان. كەيىن ەلدەرىنە ورالعان جاپوندار العىس رەتىندە ساكۋرا كوشەتتەرىن جىبەرىپ، 1950-جىلدارى اكادەميا جانىنا ءۇش ساكۋرا وتىرعىزىلعان. الايدا 1990-جىلدارى ەكى ساكۋرا «قۇرىلىسقا كەدەرگى كەلتىرەدى» دەگەن سەبەپپەن كەسىلگەن ەدى.
بيىل سول ادىلەتسىزدىك قالپىنا كەلتىرىلىپ، Kanzan جانە Kiku-Shidare تۇرىندەگى ساكۋرالار قايتا ەگىلدى. بۇل – ساتبايەۆقا دەگەن قۇرمەتتىڭ، عىلىم مەن ادامگەرشىلىككە تاعزىمنىڭ بەلگىسى.