كۇدىكتى بۇعان دەيىن كىسى ولتىرگەنى ءۇشىن سوتتالىپ، 10 جىلعا باس بوستاندىعىنان ايىرىلعان
مەملەكەت باسشىسى قاسىم-جومارت توقايەۆقا تۇركىستان وبلىسىنىڭ سارىاعاش اۋدانىندا 5 جاسار قىزدىڭ ولتىرىلگەنى جونىندەگى قايعىلى وقيعا تۋرالى مالىمەت بەرىلدى، دەپ حابارلايدى Almaty-akshamy.kz.
قۇقىق قورعاۋ ورگاندارى ءىستى تەرگەۋ امالدارىن جۇرگىزىپ جاتىر. كۇدىكتى انىقتالدى.
قولدا بار اقپارات بويىنشا، كۇدىكتى بۇعان دەيىن كىسى ولتىرگەنى ءۇشىن سوتتالىپ، 10 جىلعا باس بوستاندىعىنان ايىرىلعان. بيىل وعان ادام دەنساۋلىعىنا قاساقانا اۋىر زيان كەلتىرگەنى ءۇشىن 3 جىلعا باس بوستاندىعىن شەكتەۋ جونىندە ۇكىم شىعارىلعان.
پرەزيدەنت باس پروكۋراتۋرا مەن ىشكى ىستەر مينيسترلىگىنە بولعان قايعىلى وقيعانىڭ ءمان-جايىن مۇقيات تەكسەرۋدى تاپسىردى. توقايەۆ بيىل شىعارىلعان سوت ۇكىمىنىڭ زاڭدىلىعىن قاراستىرۋ جانە ادامعا قاتىستى اسا ءقاۋىپتى قىلمىس جاساعانى ءۇشىن قىلمىستىق جاۋاپكەرشىلىكتى كۇشەيتۋ ماڭىزدى دەپ سانايدى.
پرەزيدەنت بالانىڭ تۋىستارى مەن جاقىندارىنا قايعىرىپ كوڭىل ايتتى.
بۇعان دەيىن حابارلاعانىمىزداي، 13 شىلدەدە سارىاعاش پوليسياسىنا جەرگىلىكتى تۇرعىن 5 جاسار قىزى جوعالىپ كەتكەنىن حابارلاعان.
جەدەل-ىزدەستىرۋ شارالارى بارىسىندا پوليسەيلەر اۋىل تۇرعىندارىنىڭ ءبىرىنىڭ ۇيىنەن دەنە جاراقاتى بار قىزدىڭ ءمايىتىن تاپتى.