سارقان اۋدانىندا «جاسىل» ەنەرگەتيكانى دامىتۋ باعىتىندا اۋقىمدى جۇمىستار جۇرگىزىلىپ جاتىر
سارقان اۋدانىندا قۋاتى 50 مۆت «اباي-2» جەل ەلەكتر ستانساسىنىڭ ىسكە قوسىلۋىنىڭ سالتاناتتى ءراسىمى ءوتتى. اۋدانداعى وسى ءىرى ينۆەستيسيالىق جوباعا 19 ملرد تەڭگەدەن استام جەكە قارجى ينۆەستيسياسى تارتىلعان، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
جالپى بيىلعى جىلى وبلىستا جيىنتىق قۋاتى 23،5 مۆت بولاتىن تاعى 3 گەس پايدالانۋعا بەرىلەدى. قازىرگى كەزدە وڭىردە جاڭارتىلعان ەنەرگيا كوزدەرىنىڭ 14 نىسانى بار، ولاردىڭ جالپى قۋاتى – 160 مۆت.
سارقان اۋدانى اكىمدىگىنىڭ مالىمەتىنە قاراعاندا، لەپسى اۋىلدىق وكرۋگىندەگى جەل ەلەكتر ستانسىسىنىڭ كەزەڭ-كەزەڭىمەن جۇرگىزىلگەن قۇرىلىس جۇمىستارى 2019 جىلى باستالعان ەدى. اسىرەسە، نىساننىڭ ورنالاساتىن جەرىنە ەرەكشە نازار اۋدارىلدى. جازىق القاپ - جەلدىڭ جىلدىق ورتاشا جىلدامدىعى ءۇشىن تاپتىرماس جەر، سوندىقتان وندا جىل بويى ەلەكتر ەنەرگياسىن وندىرۋگە بولادى. نىساننىڭ قۇرىلىس-مونتاجداۋ جۇمىستارى 2022 جىلدىڭ قاراشا ايىندا تولىق اياقتالعان. سول كەزدەن بەرگى جەس-تە وندىرىلگەن ەلەكتر قۋاتى 23،767 مىڭ كۆت/ساعاتقا جەتتى.
جالپى «ENEVERSE KUNKUAT» ج ش س ىسكە اسىرعان جوبا اياسىندا 16 جەل قوندىرعىسى ورناتىلعان. جەل ماچتىنىڭ بيىكتىگى - 100 مەتر، قالاقشاسىنىڭ كولەمى – 70 مەتر. ءاربىر قۇرىلعى شامامەن 3،2 مۆت ەلەكتر ەنەرگياسىن وندىرە الادى. جالپى قۋاتى – 50 مۆت.
اتاپ وتسەك، سارقان اۋدانىندا «جاسىل» ەنەرگەتيكانى دامىتۋ باعىتىندا اۋقىمدى جۇمىستار جۇرگىزىلىپ جاتىر. اۋداندا ىسكە قوسۋ جوسپارلانعان 5 سۋ ەلەكتر ستانسىسىنىڭ بۇگىنگى كۇنى 3-ەۋى تابىستى جۇمىس ىستەپ تۇر. قالعان 2-ەۋىنىڭ قۇرىلىسى بيىل اياقتالىپ، ىسكە قوسىلادى. اتاپ ايتقاندا، «Baskan Power» جشس-نىڭ جالپى قۋاتى - 14،9 مۆت بولاتىن، قۇنى 11،7 ملرد. تەڭگەلىك، 24 جۇمىس ورنى قۇرىلاتىن جوعارعى باسقان گەس-2 جانە 3 جوباسى. وعان قوسا كەربۇلاق اۋدانىندا قۋاتى 8،6 مۆت، قۇنى 6،3 تەڭگەلىك كوكتال گەس-1 جوباسى دا بار.
وبلىستىق ەنەرگەتيكا جانە تۇكش باسقارماسىنىڭ مالىمەتىنە قاراعاندا، 2021-2025 جىلدار ارالىعىندا جەتىسۋ وبلىسىندا جالپى قۋاتتىلىعى 236،7مۆت بولاتىن 13 جاڭارتىلعان ەنەرگيا كوزى نىسانىن ىسكە قوسى جوسپارلانعان. (گەس – 10، جەس – 2، كەس – 1). سونىڭ 3-ەۋى بۇگىنگى كۇنى پايدالانۋعا بەرىلگەن، تاعى ۇشەۋى بيىل قولدانىسقا بەرىلەدى، جالپى قۋاتى 132،5 مۆت قالعان 7 نىسان 2025 جىلعا دەيىن ىسكە قوسىلۋى ءتيىس.
جالپى، جەتىسۋ وبلىسىنىڭ وزىندە وندىرىلەتىن ەلەكتر ەنەرگياسىنىڭ كولەمى 479،2 ملن. كۆت/ساعاتتى قۇراسا، ونداعى جاڭارتىلعان ەلەكتر ەنەرگياسى كوزدەرىنىڭ ۇلەسى 340،6 ملن. كۆت/ساعات بولىپ وتىر.