الماتى وبلىسىنداعى بايلانىس اسكەرلەرىنىڭ وقۋ ورتالىعىندا قازاق قاتىناس جولدارى ۋنيۆەرسيتەتىنىڭ، Narxoz ۋنيۆەرسيتەتىنىڭ، قۇرلىق اسكەرلەرىنىڭ اسكەري ينستيتۋتىنىڭ، سونداي-اق راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ وكىلدەرى بولدى، دەپ حابارلايدى Almaty-akshamy.kz.
مەرزىمدى قىزمەتتەگى ساربازدارعا وقۋ ورىندارىنا ءتۇسۋ شارتتارى، ماماندىقتارى، اسكەر مەكتەبىنەن وتكەندەردىڭ مۇمكىندىكتەرى مەن ارتىقشىلىقتارى تۋرالى ايتىلدى.
– اسكەرگە دەيىن تەمىرجولدا جۇمىس ىستەدىم. قىزمەتتەن كەيىن قازاق قاتىناس جولدارى ۋنيۆەرسيتەتىنە ءتۇسۋدى جوسپارلاپ وتىرمىن. وسى ۋنيۆەرسيتەت وكىلدەرىمەن كەزدەسۋدىڭ ارقاسىندا كوپتەگەن ماسەلەلەردى ءتۇسىندىم. ەندى وقۋعا گرانت الۋ ءۇشىن ءوزىمدى كورسەتۋگە تىرىسامىن، – دەدى قاتارداعى جاۋىنگەر بەكتۇر ورىنبەكوۆ.
جاۋىنگەرلىك جانە مەملەكەتتىك-قۇقىقتىق دايارلىقتان ۇزدىك ناتيجە كورسەتىپ جۇرگەن، بولىمشەنىڭ قوعامدىق ومىرىندە بەلسەندى جانە ءتارتىپتى مەرزىمدى قىزمەتتەگى ساربازدارى ەلىمىزدىڭ وقۋ ورىندارىندا تەگىن جوعارى ءبىلىم الاتىنىن ايتا كەتەيىك.
بيىل ەلىمىزدىڭ قورعانىس مينيسترلىگى مەن جوعارى وقۋ ورىندارىنىڭ بەلگىلەنگەن مەرزىمدە قىزمەت ەتكەن اسكەري قىزمەتشىلەرگە تەگىن جوعارى ءبىلىم الۋ مۇمكىندىگىن بەرۋ جونىندەگى كەلىسىمدەرى كۇشىنە ەندى. وندا ىنتىماقتاستىق باعىتتارىمەن قوسا، جوعارى وقۋ ورىندارىنا كونكۋرسسىز ءتۇسۋ ءۇشىن جىل سايىن بولىنەتىن ورىندار سانى دا بەلگىلەنگەن.
جۋىردا وقۋ ورتالىعىندا قازاق ۇلتتىق تەحنيكالىق ۋنيۆەرسيتەتى مەن الماتى ەنەرگەتيكا جانە بايلانىس ينستيتۋتىنىڭ وكىلدەرىمەن كەزدەسۋلەر وتپەك.