ساربازدار دا ءوز تاڭداۋىن جاسادى

ق ر ۇلتتىق ۇلانىنىڭ «وڭتۇستىك» وڭىرلىك قولباسشىلىعىنا قاراستى اسكەري بولىمدەردە 9 سايلاۋ ۋچاسكەسى جۇمىس ىستەپ تۇر.  ونىڭ ۇشەۋى – الماتى قالاسىندا. 

بۇل ۋچاسكەلەردە داۋىس بەرۋ باسقالارعا قاراعاندا ءبىر ساعاتقا ەرتە،  ياعني ساعات تاڭعى 06.00-دەن باستالدى.  كۇندىزگى  ساعات 10 بولماي، 4 مىڭعا جۋىق مەرزىمدىك قىزمەتتەگى سارباز داۋىس بەرىپ بولدى.  ونىڭ ىشىندە 600-گە جۋىعى الماتى قالاسىندا.  ۇلتتىق ۇلان ساربازدارى داۋىس بەرۋدى بارىنەن بۇرىن اياقتادى.  داۋىس بەرۋ ولاردىڭ قىزمەتىنە ەش كەدەرگى كەلتىرگەن جوق. جۇمىس جوعارى دەڭگەيدە ۇيىمداستىرىلدى.  قاراۋىلداعى ساقشىلاردىڭ دا اۋىساتىن مەرزىمى ەسەپكە الىنعان.  ءبارى تارتىپكە ساي جۇرگىزىلدى.

ءبىر ايتا كەتەرلىگى، داۋىس بەرۋشى ساربازداردىڭ جاسى 18-20 جاس ارالىعىندا ەكەنىن ەسكەرسەك، ولاردىڭ باسىم بولىگى ومىرىندە العاش رەت داۋىس بەرىپ تۇر.  بۇل جاعداي دا ەسكەرۋسىز قالعان جوق،  العاش داۋىس بەرگەن ساربازدارعا كىشىگىرىم ەستەلىك سىيلىقتار بەرىلدى. 

ساربازدار كوتەرىڭكى كوڭىل كۇيمەن كەلدى. ولار وزدەرىنىڭ بولاشاعى ءۇشىن داۋىس بەرگەندەرىن جاقسى تۇسىنەدى جانە وسى رەفەرەندۋمنان وڭ ناتيجەلەر بولاتىنىنا   سەنىمدى.  

الماتىدا ۇلاندىقتاردىڭ داۋىس بەرۋىن «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امىرەيەۆ تۇيىندەپ،  نۇكتەسىن قويدى. ول ۋاقىتقا دەيىن بارلىق اسكەري بولىمدەردىڭ اسكەري قىزمەتشىلەرى رەفەرەندۋمعا قاتىسىپ،  داۋىس بەرگەندىكتەرى تۋرالى بايانداپ ۇلگەرگەن بولاتىن.