ساراپشىلار قازاقستاننىڭ باستى ساياسي پارتياسىنىڭ اتاۋى تۋرالى پىكىرلەرىن ءبىلدىردى

Nur Otan پارتياسىنىڭ «امانات» دەپ اۋىسۋى – ۇيىمدا بولاتىن  اۋقىمدى وزگەرىستەردىڭ باسى عانا. قازاقستاندىق ساراپشىلار وسىنداي پىكىردە.

ولاردىڭ ايتۋىنشا، پارتياداعى وزگەرىستەردى ونىڭ باسشىلىعىنىڭ قوعام پىكىرىنە قۇلاق اسقاندىعىن جانە حالىقپەن ديالوگ ورناتۋ جۇمىسىن ودان ءارى جانداندىرۋعا نيەتتى ەكەنىن كورسەتەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

«پارتيانىڭ مىقتى تۇسى – ونىڭ ينستيتۋسيونالدىق بازاسى، ءارى ەلەكتوراتى وتە كەڭ. ءالسىز تۇسى – Nur Otan پارتياسىنىڭ شەكتەن تىس بيۋروكراتيزاسيالانۋى جانە حالىقتىڭ مۇددەسىن بىلدىرمەۋى. مۇنى قاڭتار وقيعاسى انىق كورسەتتى. ەندى پارتيا مەن ساياسي پارتيالار كوبەيەدى دەپ ويلايمىز. Nur Otan پارتيا مۇشەلەرىن ساقتاپ قالۋى جانە بەلسەندى جۇمىس ىستەۋى ءۇشىن ءوز كوزقاراسىن وزگەرتۋى قاجەت»، - دەيدى قازاقستان قوعامدىق دامۋ ينستيتۋتىنىڭ ساراپشىسى جۇلدىزاي ىسقاقوۆا.

«امانات» پارتياسى ءوز ۇستانىمدارى مەن جۇمىس تاسىلدەرىن جاڭعىرتا باستاعانى قۇپتارلىق ءىس. ەۋرازيالىق ينتەگراسيا ينستيتۋتىنىڭ ديرەكتورى ورازعالي سەلتەيەۆتىڭ ايتۋىنشا، پارتيا جۇمىسى كوممۋنيكاسيانى قۇرۋدان باستاپ، ءتيىمدى ناتيجەلەرگە باعىتتالۋى كەرەك.

«ءقازىر ماڭىزدىسى - پارتيا مەن ەلەكتورات، ورتالىق اپپارات پەن فيليالدار، دەپۋتاتتار مەن حالىق اراسىنداعى بايلانىستى ارتتىرۋ. ايتقىم كەلگەنى، جۇمىس ساياسي ۇيىمنىڭ اتاۋى مەن لوگوتيپىن وزگەرتۋمەن شەكتەلمەۋى ءتيىس»، - دەيدى ەۋرازيالىق ينتەگراسيا ينستيتۋتىنىڭ ديرەكتورى ورازعالي سەلتەيەۆ.