ساراپشىلار باسپانا باعاسى تۇسەتىنىن بولجاپ وتىر

پاتەرلەردىڭ قىمباتتاۋىنا ايقىن سەبەپتەر جوق.

ءبىرقاتار قازاقستاندىق  ساراپشىلار الداعى ۋاقىتتا ءۇي باعاسىنىڭ تومەندەيتىنىنە سەنىمدى، دەپ حابارلايدى Almaty-akshamy.kz Turkystan.kz سىلتەمە جاساپ.

سوڭعى جىلدارى تۇرعىن ءۇي نارىعىن بۇرىن-سوڭدى بولماعان قىمباتشىلىق جايلادى. تەك بىلتىر باعا بىردەن 10-12 پايىزعا ءوستى. دەگەنمەن، ءبىرقاتار ساراپشىلار الداعى ۋاقىتتا ءۇي باعاسىنىڭ تومەندەيتىنىنە سەنىمدى. 

«ەلدە قاڭتار وقيعاسىنان كەيىنگى جاعداي بىرتىندەپ تۇزەلىپ كەلەدى. ادامدار قالىپتى ومىرگە قايتا ورالدى. ينفلياسياعا بايلانىستى پاتەر باعاسى جىل سايىن ورتا ەسەپپەن 10%-عا قىمباتتاۋدا. ساتۋشىلار باعانى شىنىمەن كوتەردى. ءاربىر ساتۋشى باسپانانى مەيىلىنشە قىمباتقا وتكىزگىسى كەلەدى. ال ساتىپ الۋشى، كەرىسىنشە، ارزانعا ىزدەيدى. بۇل - زاڭدى قۇبىلىس. ءقازىر زەينەتاقى جيناعىنىڭ جەتكىلىكتى شەگى ارتتى. سوندىقتان باسپانانىڭ باعاسى ارزاندايدى»، – دەيدى قازاقستاننىڭ بىرىككەن ريەلتورلار قاۋىمداستىعىنىڭ پرەزيدەنتى لاريسا ستەپانەنكو.

سپيكەردىڭ سوزىنشە، ءقازىر پاتەرلەردىڭ قىمباتتاۋىنا ايقىن سەبەپتەر جوق. ويتكەنى سۇرانىس نارىقتاعى ۇسىنىستان الدەقايدا تومەن. جازعا قاراي، ادەتتەگىدەي، ەلدە حالىقتىڭ بەلسەندى كوشى-قونى باستالادى.

«جاز ۋاقىتىندا كوپ باسپانا ساتىلىمعا شىعارىلادى. الايدا، بۇل باعانى نەگىزسىز وسىرۋگە اكەلمەۋى كەرەك. سەبەبى، حالىقتىڭ جالاقىسى وسكەن جوق. مەملەكەت تۇرعىن ءۇي ساتىپ الۋ ءۇشىن بانكتىك باعدارلامالاردى ءالى شىعارعان جوق. ءۇي يەلەرى ساتىلىمعا قويعان باسپاناسىنىڭ باعاسىن تۇسىرەدى. بىزدە پاتەر ساتۋشىلار كوپ تە، ساتىپ الۋشىلاردىڭ سانى  الدەقايدا از. سوندىقتان باسپانا ارزانداۋى كەرەك. ءۇيىن ساتقىسى كەلەتىن ادامدار ونىڭ باعاسىن تۇسىرۋگە ءماجبۇر بولادى»، – دەپ قورىتىندىلادى ءسوزىن لاريسا ستەپانەنكو.