2025 جىلعا قاراي تۇتىنۋشىلاردىڭ قۇقىقتارىن قورعاۋدىڭ تيىمدىلىگىن 74،7%-عا دەيىن ارتتىرۋ مىندەتى تۇر.
ساۋدا جانە ينتەگراسيا مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى سەرىك جۇمانعارين بىلتىر تۇتىنۋشىلار تاراپىنان 30 مىڭنان استام ءوتىنىش تۇسكەنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وتكەن جىلدىڭ قورىتىندىسى بويىنشا، تۇتىنۋشىلاردىڭ 30 مىڭنان استام ءوتىنىشى قارالدى. بۇل – 2021 جىلمەن سالىستىرعاندا 20 پايىزعا ارتىق. تۇتىنۋشىلارعا شامامەن 800 ملن تەڭگە قايتارىلدى. تۇتىنۋشىلاردىڭ وتىنىشتەرىن قابىلداۋ جانە قاراستىرۋ پروسەسىن اۆتوماتتاندىرۋ ءۇشىن e-Tutynushy سالالىق اقپاراتتىق جۇيەسى e-Otinish-پەن بىرىكتىرىلگەن»، - دەپ اتقارىلعان جۇمىستاردىڭ قورىتىندىسىنا توقتالدى مينيستر.
ونىڭ ايتۋىنشا، تۇتىنۋشىلاردىڭ قۇقىعىن قورعاۋ باعىتىنداعى زاڭنامالىق تۇزەتۋلەردىڭ ەكىنشى پاكەتى ازىرلەنگەن.
«زاڭنامالىق تۇزەتۋلەردىڭ نەگىزگى باسىمدىقتارىنىڭ قاتارىنا ومبۋدسمەن ينستيتۋتىن ەنگىزۋ، بيزنەس قىزمەتتەرىنىڭ بارلىق سالالارىنا بازالىق قاعيداتتاردى تاراتۋ جانە ەلەكتروندىق ساۋداداعى رەتتەۋ ماسەلەلەرى كىرەدى. ماۋسىم ايىندا زاڭ جوباسىن پارلامەنتكە ەنگىزۋدى جوسپارلاپ وتىرمىز. جالپى، 2025 جىلعا قاراي تۇتىنۋشىلاردىڭ قۇقىقتارىن قورعاۋدىڭ تيىمدىلىگىن 74،7%-عا دەيىن ارتتىرۋ مىندەتى تۇر»، - دەپ تۇيىندەدى سەرىك جۇمانعارين.