اۆتوسالون ەر ازاماتقا 18 ملن تەڭگەدەن استام سوماعا ساپاسىز اۆتوكولىك ساتقان
31 قازان مەن 4 قاراشا ارالىعىندا قۇقىعى بۇزىلعان ساتىپ الۋشىلارعا جالپى سوماسى 36 ملن تەڭگە قايتارىلدى. بۇل تۋرالى Almaty-akshamy.kz ساۋدا جانە ينتەگراسيا مينيسترلىگىنىڭ تۇتىنۋشىلاردىڭ قۇقىعىن قورعاۋ كوميتەتىنە سىلتەمە جاساپ حابارلايدى.
5 كۇن ىشىندە كوميتەت پەن ونىڭ وڭىرلىك دەپارتامەنتتەرىنە تۇتىنۋشىلار تاراپىنان 608 ءوتىنىش تۇسكەن.
«331 تۇتىنۋشىعا (وتىنىشتەردىڭ 54%) قۇقىقتىق كومەك كورسەتىلدى، 274 شاعىم (45%) قاناعاتتاندىرىلدى، 87 ءوتىنىش قۇزىرەتىنە سايكەس مەملەكەتتىك ورگاندارعا جىبەرىلدى. سونداي-اق ءبىر اپتانىڭ ىشىندە سوتقا 1 تالاپ قويىلدى، 1 ەسكەرتۋ شىعارىلدى. ال 4 جاعداي تاتۋلاسۋمەن شەشىلدى»، - دەلىنگەن كوميتەت تاراتقان حابارلامادا.
قۇزىرلى ورگان دەرەگىنشە، ەلوردالىق تۇرعىن سالىنعان ساپاسىز باسپاناعا قاتىستى شاعىم تۇسىرگەن. كەيىن تۇتىنۋشى تالابىنا ساي ءتيىستى دەپارتامەنت سوتقا شاعىم جولداعان. ناتيجەسىندە تۇرعىن ءۇيدى سالۋ بارىسىندا كەمشىلىك جىبەرگەن مەردىگەر ولقىلىقتاردى جويعان. ۆەدومستۆو دەرەگىنشە، شىعىن سوماسى 10 ملن تەڭگەگە باعالانعان.
سونىمەن قاتار باتىس قازاقستان وبلىسى تۇرعىننىڭ شاعىمىنان كەيىن وعان 18 ملن تەڭگەدەن استام قاراجات قايتارىلعان.
«اۆتوسالون ەر ازاماتقا 18 ملن تەڭگەدەن استام سوماعا ساپاسىز اۆتوكولىك ساتقان. سونىمەن قاتار ولار كليەنتكە 300 مىڭ تەڭگەگە قوسىمشا جابدىق ساتىپ الۋ تالابىن قويعان. ول اۋماقتىق دەپارتامەنتكە شاعىم تۇسىرگەننەن كەيىن اۆتوكولىگى ءتيىستى ساپاداعى كولىككە اۋىستىرىلدى، قوسىمشا جابدىق ءۇشىن تولەنگەن بارلىق قاراجات قايتارىلدى»، - دەپ ءمالىم ەتتى كوميتەتتەن.
بۇدان وزگە، اقمولا، ماڭعىستاۋ جانە شىعىس قازاقستان وبلىستارىنىڭ تۇرعىندارى «Wildberries» ينتەرنەت-دۇكەنىنەن ساپاسىز تاۋارلار الىپ، ونى كەرى قايتارا الماعان. بۇل ىسكە تۇتىنۋشىلاردىڭ قۇقىعىن قورعاۋ كوميتەتى ارالاسىپ، كەيىن تۇرعىندارعا جالپى سوماسى 330 مىڭ تەڭگەدەن استام شىعىنى وتەلگەن.