ناۋقان وسى جىلدىڭ 20 جەلتوقسانىنا دەيىن جالعاسادى
قازاقستاندىق وقۋشىلار مەن اتا-انالار مەكتەپ اجەتحانالارى، جۋىناتىن بولمەلەردەگى پروبلەمالار جانە اسحاناسىنداعى بۇزۋشىلىقتار تۋرالى وقۋ-اعارتۋ مينيسترلىگىنە حابارلاي الادى. بۇل تۋرالى Almaty-akshamy.kz مينيسترلىككە سىلتەمە جاساپ حابارلايدى.
ايتا كەتەرلىگى، اۆتورلاردىڭ انونيمدىلىگىنە كەپىلدىك بەرىلىپ، ولار تۋرالى اقپارات جاريا ەتىلمەيدى. مەكتەپ اجەتحانالارى مەن اسحانالارىنداعى كەمشىلىكتەر تۋرالى فوتو جانە ۆيدەونى 8 700 699 04 46 ءنومىرى ارقىلى What’s App جانە Telegram-BOT-قا، Instagram جەلىسىندەگى @balaga.laiyq پاراقشاسىن بەلگىلەۋ ارقىلى جىبەرۋگە بولادى. سونداي-اق مەكتەپتەرگە وسى الەۋمەتتىك جەلىلەرگە سىلتەمەلەرى بار QR-كودتار قوسىمشا جىبەرىلدى.
وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ باستاماسىمەن «بالاعا لايىق» اكسياسى ءوتىپ جاتقانىن ەسكە سالا كەتەيىك. اكسيا «مەكتەپتىڭ جاقسارۋىنا كومەكتەس!» ۇرانىمەن ءوتىپ جاتىر. سونداي-اق ناۋقان وسى جىلدىڭ 20 جەلتوقسانىنا دەيىن جالعاسادى.
«اكسياعا كەز كەلگەن وقۋشىلار، ەرىكتىلەر، بالالار وكىلدىگى، مۇعالىمدەر، اتا-انالار، ۇكىمەتتىك ەمەس ۇيىمداردىڭ وكىلدەرى جانە ت.ب. قاتىسا الادى. «بالاعا لايىق» اكسياسىنىڭ ناتيجەسىندە مەكتەپتەگى جۋىناتىن بولمەلەر مەن اسحانالاردىڭ جاعدايى ايتارلىقتاي جاقسارعانىن ايتا كەتكەن ءجون. زاڭ بۇزۋشىلىقتار انىقتالعان 100-دەن استام مەكتەپتە جوندەۋ جۇمىستارى جۇرگىزىلىپ، كەمشىلىكتەر جويىلدى. مىسالى، پاۆلودار قالاسىنداعى №5 ورتا مەكتەپتىڭ اجەتحاناسىنداعى كابينالار اتا-انالاردىڭ مينيسترلىك وكىلدەرىنە بەرگەن وتىنىشىنەن كەيىن قالىپقا كەلتىرىلدى. سولتۇستىك قازاقستان وبلىسى ارىقبالىق اۋىلىنىڭ مەكتەبىندە سۋ قۇبىرلارى اۋىستىرىلىپ، جوندەۋ جۇمىستارى جۇرگىزىلدى. ورال يننوۆاسيالىق ليسەيى اسحاناسىنىڭ جۇمىسىنا قاتىستى تۇسكەن وتىنىشتەن كەيىن مەكتەپتە اسحاناعا دەزينفەكسيا جۇرگىزىلىپ، وقۋشىلاردى تاماقتاندىرۋ ساپاسى جاقسارتىلدى. مەكتەپتەگى اجەتحانالار مەن اسحانالارعا مونيتورينگ جازالاۋ ءۇشىن ەمەس، بالالارعا قاجەتتى جاعداي جاساۋعا مەكتەپتەردى بىرلەسە تارتۋ ءۇشىن جۇرگىزىلىپ جاتقانىن اتاپ وتكىم كەلەدى»،- دەدى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
اكسيا كەزىندە مەكتەپتەردىڭ جۋىناتىن بولمەلەرى مەن اسحانالارىنىڭ جاعدايى تۋرالى بارلىعى 1 000-نان استام شاعىم ءتۇستى. ەڭ بەلسەندىلەردىڭ اراسىندا استانا مەن الماتى قالالارىنىڭ، الماتى، اقمولا جانە قىزىلوردا وبلىستارىنىڭ وقۋشىلارى مەن اتا-انالارى بار. ءاربىر ءوتىنىشتى وبلىستىق ءبىلىم باسقارمالارى قارايدى. ۇساق-تۇيەك كەمشىلىكتەردى مەكتەپتەردىڭ ءوزى انىقتاپ، جويادى.