الماتىدا اباي داڭعىلىنىڭ ۋچاسكەلەرىندەگى ويىقتار جاقىن كۇندەرى مەردىگەردىڭ ەسەبىنەن جويىلادى - قمب
قالالىق موبيلدىلىك باسقارماسى الماتىداعى اباي داڭعىلىنىڭ ۋچاسكەلەرىندە ويىقتاردىڭ پايدا بولۋ سەبەپتەرى جانە ولاردىڭ قاشان جويىلاتىنى تۋرالى ايتتى، دەپ حابارلايدى aqshamnews.kz
بۇل تۋرالى قالالىق موبيلدىلىك باسقارماسىنىڭ باسشىسى ساعىندىق تەلىبايەۆ الماتى ءماسليحاتىنىڭ كەزەكتى سەسسياسى بارىسىندا دەپۋتاتتاردىڭ سۇراقتارىنا جاۋاپ بەرگەندە ايتتى.
«وتكەن جىلى اباي داڭعىلىنىڭ دوستىق داڭعىلىنان تىلەندييەۆ كوشەسىنە دەيىنگى ۋچاسكەسىندە اسفالتبەتون جابىنىنىڭ ەكى قاباتى توسەلىپ، ورتاشا جوندەۋ جۇمىستارى جۇرگىزىلگەنى بەلگىلى. الايدا، بۇگىندە قوعامدىق كولىكتەرگە ارنالعان بولەك جولاقتا ءارقايسىسىنىڭ ۇزىندىعى 20 مەتر بولاتىن 6 ۋچاسكەدە ويىقتار انىقتالدى. اتالعان ۋچاسكەلەردە اسفالتبەتون قاباتتارىنان جول جابىنىنىڭ نەگىزىنە دەيىن كەرندى ىرىكتەۋمەن زەرتحانالىق زەرتتەۋلەر جۇرگىزىلدى»، - دەدى ساعىندىق تەلىبايەۆ.
باسقارما باسشىسىنىڭ ايتۋىنشا، ىرىكتەۋ ناتيجەلەرى بويىنشا كەرندەردىڭ ورتاسىندا ويىق بار ەكەنى انىقتالعان. بۇل بەرىكتىگى تومەن ەسكى اسفالتبەتوندى كورسەتەدى، 15-تەن 30 سم-گە دەيىنگى تەرەڭدىكتەگى ەسكى اسفالتبەتون وتە جۇقا.
وتكەن كەزەڭدەردە ءجيى جوندەلگەندىكتەن جۇقارىپ قالعان.
«اقاۋلاردى جويۋ ماقساتىندا 29 تامىز كۇنى كەشكە مەردىگەر ۇيىم كەپىلدىك مىندەتتەمەلەرى اياسىندا ءوز قاراجاتى ەسەبىنەن جولتابانمەن ۋچاسكەلەردى فرەزەرلەۋدى باستايدى، سودان كەيىن ءۇش قاباتتى اسفالتبەتون توسەلەدى»،- دەدى قمب-نىڭ باسشىسى.
ول جالپى بارلىق جوندەلەتىن جولداردا ساپانى باقىلاۋ ءۇشىن تەحنيكالىق جانە اۆتورلىق قاداعالاۋ قىزمەتتەرى تارتىلاتىنىن ايتتى. سونىمەن قاتار، جول-قۇرىلىس جۇمىستارىنىڭ ساپاسىن باقىلاۋدى اۆتوموبيل جولدارى كوميتەتىنىڭ جول اكتيۆتەرى ساپاسىنىڭ ۇلتتىق ورتالىعى جۇزەگە اسىرادى.