الماتىدا 2900 ءبىلىم بەرۋ قىزمەتكەرىنىڭ قاتىسۋىمەن تامىز كەڭەسى ءوتتى
2023 جىلعى 25 تامىزدا رەسپۋبليكا سارايىندا 2023-2024 وقۋ جىلىنىڭ باستالۋىنا ارنالعان «ادىلەتتى قازاقستان: ساپالى ءبىلىم، ادال ۇرپاق، تابىستى ۇلت» تاقىرىبىندا ءبىلىم بەرۋ قىزمەتكەرلەرىنىڭ تامىز كەڭەسى ءوتتى.
بيىلعى جىلى فورۋمعا رەسپۋبليكانىڭ تۇكپىر-تۇكپىرىنەن 2900 ءبىلىم بەرۋ قىزمەتكەرى جينالدى. ءىس-شارا پەداگوگ قىزمەتكەرلەردىڭ كاسىبي دەڭگەيىن ارتتىرۋعا، ءبىلىم بەرۋ سالاسىندا تاجىريبە جانە جاڭا تەحنولوگيالارمەن الماسۋعا باعىتتالعان، دەپ حابارلايدى Almaty-akshamy.kz.
فورۋمنىڭ پلەنارلىق وتىرىسىنىڭ جۇمىسىنا الماتى قالاسىنىڭ اكىمى ەربولات دوسايەۆ، ق ر ءبىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا، قازاقستان پروفيلاكتيكالىق مەديسينا اكادەمياسىنىڭ جانە ۇلتتىق سالاۋاتتى تاماقتانۋ ورتالىعىنىڭ پرەزيدەنتى الماز شارمان، «سانكت-پەتەربۋرگ ەرتە ارالاسۋ ينستيتۋتى» قوسىمشا كاسىپتىك ءبىلىم بەرۋدىڭ دەربەس كوممەرسيالىق ەمەس ۇيىمىنىڭ ديرەكتورى گان چين حۋات، (سينگاپۋر ق.)، Sing ing-Ed Global Schoolhouse Pre LTD اتقارۋشى ۆيسە-پرەزيدەنتى جانە ءبىلىم بەرۋ سالاسىنداعى باسقا دا قازاقستاندىق جانە شەتەلدىك ساراپشىلار قاتىستى.
سونداي-اق، ءىس-شاراعا تەلەكوپىر فورماتىندا قازاقستان رەسپۋبليكاسىنىڭ پرەمەر-مينيسترى ءاليحان سمايىلوۆ، قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى ايدا بالايەۆا، ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا، ءبىلىم ءمينيسترى عاني بەيسەمبايەۆ قاتىستى.
«جىل سايىنعى تامىز جينالىسى قازىرگى ءبىلىم بەرۋدىڭ جاڭا باعىتىنا سەرپىن بەرەدى. بۇل ەڭ جاقسى شەشىمدەر جولىندا جيناقتالعان ءبىلىم جانە وزىق تاجىريبەمەن الماسۋعا ارنالعان الاڭ. بۇگىن بالانىڭ فيزيكالىق جانە پسيحولوگيالىق دەنساۋلىعىن قولداۋعا، ساپالى ءبىلىم بەرۋمەن، دامۋ مۇمكىندىكتەرىمەن جانە باسقا دا جاعدايلارمەن قامتاماسىز ەتۋگە باعىتتالعان جوبالار ۇسىنىلدى. ءىس- شارا جاڭا وقۋ جىلى قارساڭىندا دامۋ ماسەلەلەرى مەن پەرسپەكتيۆالادى انىقتاۋعا كومەكتەسەدى»، - دەدى الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا.
جيىن بارىسىندا زاماناۋي ءبىلىم بەرۋدىڭ وزەكتى ماسەلەلەرى تالقىلاندى. پلەنارلىق وتىرىستا ءبىلىم بەرۋ سالاسىنداعى جەتەكشى ماماندار، عالىمدار مەن پەداگوگتار ءسوز سويلەدى. ولار ءوز تاجىريبەلەرىمەن جانە بىلىمدەرىمەن ءبولىستى، كۇندەلىكتى جۇمىستا كەزدەسەتىن جەتىستىكتەر مەن قيىندىقتار تۋرالى ايتتى. شەبەرلىك سىنىپتارى مەن باسقا دا ەكسكۋرسيالار ۇيىمداستىرىلدى
سونداي-اق سەكسيالاردا ەلىمىزدەگى بالالاردىڭ ءومىرىن جاقسارتۋ ماسەلەلەرى مەن پەرسپەكتيۆالارى، بالالىق شاق كەزىندەگى مەملەكەتتىك كەپىلدىكتەر جانە ولاردى ىسكە اسىرۋ تالقىلاندى. ءبىلىم بەرۋ ۇيىمدارى قىزمەتكەرلەرىنىڭ پلەنارلىق وتىرىسى ءبىلىم بەرۋدىڭ جانە پەداگوگتەردىڭ بىلىكتىلىگىن ارتتىرۋدىڭ ماڭىزدى ماسەلەلەرىن تالقىلاۋ ءۇشىن وزەكتى الاڭعا اينالدى.
ەسكە سالساق، قازاقستان رەسپۋبليكاسى پرەمەر-مينيسترىنىڭ 2022 جىلعى 1 اقپانداعى № 21 وكىمىمەن بەكىتىلگەن بالالاردىڭ ءال – اۋقاتىنىڭ يندەكسى-بۇل ەلىمىزدەگى بالالاردىڭ ءومىر ءسۇرۋ ساپاسىن باعالاۋدىڭ جاڭا قۇرالى. يندەكس بالالاردىڭ ءومىر ءسۇرۋ دەڭگەيىن، دەنساۋلىعىن، ءبىلىمىن، دامۋ مۇمكىندىكتەرىن، قاۋىپسىزدىگىن جانە باسقا جاعدايلاردى باعالاۋعا مۇمكىندىك بەرەدى. ساراپشىلاردىڭ باياندامالارىندا وسى يندەكستى پايدالانۋدىڭ العاشقى ناتيجەلەرى ۇسىنىلادى، ءومىردىڭ ءتۇرلى كەزەڭدەرىندە بالالاردىڭ ءال-اۋقاتىنىڭ انىقتالعان ماسەلەلەرى كورسەتىلەدى، ولاردى جاقسارتۋ ءۇشىن شەشىمدەر ۇسىنىلادى.
كەڭەس سوڭىندا بالالاردىڭ ءال-اۋقاتىنىڭ يندەكسىنە، ءبىلىم بەرۋ مەكەمەلەرىندە تاماقتانۋدى ۇيىمداستىرۋعا بايلانىستى ماسەلەلەر مەن قورىتىندىلار شىعارىلدى. اتاپ ايتقاندا، ولاردى شەشۋدىڭ جاڭا شارالارىن ازىرلەۋ جانە قابىلداۋ ءۇشىن ناقتىلى ۇسىنىستار بەرىلدى.