بوستاندىق اۋدانىندا تۇرعىنداردىڭ ءوتىنىشى بويىنشا جۇزەگە اسىرىلعان نىساندارعا ارنالعان باسپا ءسوز تۋرى ءوتتى. ءىس-شاراعا بوستاندىق اۋدانىنىڭ اكىمى سانجار الين قاتىسىپ، جۋرناليستەردى كوركەيتۋ جۇمىستارىنىڭ ناتيجەلەرىمەن تانىستىردى، دەپ حابارلايدى aqshamnews.kz
باسپا ءسوز تۋرى بارىسىندا قالا ينفراقۇرىلىمىن جاقسارتۋ بويىنشا اۋقىمدى جۇمىستار جۇرگىزىلگەن بەس نەگىزگى نىسانعا باردى:
العاشقى نىسان وربيتا-4 شاعىن اۋدانىنداعى (№6 جانە №7 ۇيلەر اراسىنداعى) جاياۋ جۇرگىنشىلەر ايماعى بولدى. مۇندا كەسپە تاس توسەۋ، اسفالت جانە رەزەڭكە جابىن سالۋ، گابيوندار ورناتۋ، كوشە جارىقتاندىرۋ جۇيەسى مەن پەرگولالاردى ورناتۋ، ترەناجەر، ۆوركاۋت جانە بالالار الاڭدارىن سالۋ، سونداي-اق اۆتوسۋارۋ جۇيەسى مەن باقشا قورشاۋلارىن ورناتىپ، كوگالداندىرۋ جۇمىستارى جۇرگىزىلدى.
جەرگىلىكتى تۇرعىندار جاڭا الاڭدى كوركەيتكەنى ءۇشىن العىس ءبىلدىردى. «باستاما كوتەرگەن تۇرعىندارعا كوپ راقمەت. بۇل ءبىزدىڭ سوڭعى جوبامىز ەمەس، جۇمىس جالعاسادى، كوركەيتۋ ءۇشىن اۋماقتاردى ىزدەپ جاتىرمىز»، – دەدى بوستاندىق اۋدانىنىڭ اكىمى سانجار الين.
ەكىنشى جوبا وربيتا-3 شاعىن اۋدانىنداعى 52ء-ۇيدىڭ جانىنداعى جاياۋ جۇرگىنشىلەر ايماعى ەدى. مۇندا كەسپە تاس، گەوتەكستيل جانە اسفالت جابىندارى توسەلدى، كوشەنىڭ جارىقتاندىرۋ جۇيەسى مەن پەرگولالار ورناتىلدى، بالالار الاڭى مەن ورىندىقتار قويىلدى.
تۋرعا قاتىسۋشىلار جاندوسوۆ كوشەسى، 34ا مەكەنجايىنداعى بالالار الاڭىنا دا ات باسىن بۇردى.
بۇل جەردە فۋتبول الاڭى جاڭارتىلىپ، ستريتبول الاڭى سالىندى، ەكى پەرگولا، ترەناجەر، ۆوركاۋت جانە بالالار الاڭى ورناتىلدى. اسفالت جابىنى اۋىستىرىلىپ، التى ورىندىق پەن التى قوقىس جاشىگى قويىلدى.
سونداي-اق، تۇرعىندار شاحمات ۇستەلى مەن 250 مەترلىك كوگال قورشاۋى ءۇشىن ەرەكشە ريزاشىلىق ءبىلدىردى.
كەلەسى نۇكتە ءال-فارابي داڭعىلى مەن جاروكوۆ كوشەسىنىڭ قيىلىسىنداعى تەحنيكالىق تروتۋارلاردى كوركەيتۋ ەدى.
تەحنيكالىق تروتۋارلار ماگيسترالدى كوشەلەردە ورنالاسىپ، جەردىڭ سىرعىپ كەتۋىنە جول بەرمەيدى جانە قاردى ساپالى تازارتۋعا كومەكتەسەدى. سونداي-اق، بۇل تروتۋارلار سۋ بۇرۋ ماسەلەسىن شەشىپ، نوسەر جاۋىن كەزىندە تروتۋارلاردىڭ سۋ باسۋىنا جول بەرمەيدى. الماتىنىڭ قۇبىلمالى كليماتىندا بۇل اسا ماڭىزدى.
باسپا ءسوز تۋرىنىڭ سوڭعى ايالداماسى اباي داڭعىلىنىڭ بويىنداعى (تۇرعىت وزال مەن مۇقانوۆ كوشەلەرىنىڭ ارالىعى) بولىنگەن جاسىل ايماقتى كوركەيتۋ جۇمىستارى جۇرگىزىلگەن نىسان بولدى.
اۋماعى 5،2 گا بولاتىن بۇل ايماقتا سوڭعى رەت كوركەيتۋ جۇمىستارى 15 جىل بۇرىن جۇرگىزىلگەن.
بۇل جەردە 120 جارىق باعانىن جاڭارتۋ، 110 ورىندىق پەن قوقىس جاشىگىن اۋىستىرۋ، 7020 م اسفالت جابىندىسىن الىپ تاستاپ، 8000 م² كەسپە تاس توسەۋ، 10 شاقىرىمدىق سۋارۋ جۇيەسىن سالۋ، جاسىل جەلەكتەردى سانيتارلىق ماقساتتا كەسۋ جانە كوگالداندىرۋ (1000 م قىنا اعاش، 2500 گۇلدەيتىن بۇتا، 41 000 م² كوگال) سياقتى اۋقىمدى جۇمىستار جۇرگىزىلدى.
«بۇل جوبالار تۇرعىنداردىڭ ۇسىنىسى مەن يدەياسىنىڭ ارقاسىندا جۇزەگە استى. ءبىز اۋدانىمىزداعى ءومىر ساپاسىن جاقسارتۋ باعىتىنداعى جۇمىستى جالعاستىرا بەرەمىز»، – دەدى بوستاندىق اۋدانىنىڭ اكىمى سانجار الين.
الماتىدا قالالىق ينفراقۇرىلىمدى جاقسارتۋعا باعىتتالعان جوبالار قارقىندى تۇردە دامىپ كەلەدى. بۇل ۇدەرىستە «حالىق قاتىساتىن بيۋدجەت» باعدارلاماسى ماڭىزدى ءرول اتقارادى. ونىڭ كومەگىمەن ءار تۇرعىن اۋدانىن جاقسارتۋ جۇمىستارىنا تىكەلەي قاتىسا الادى. بۇل ءوز كەزەگىندە قالانى ءومىر سۇرۋگە قولايلى ءارى جايلى ەتەدى.
