بالالار دەمالاتىن لاگەرلەردە سانيتارلىق نورمالار ورىندالماسا، بۇل نىساندار بىردەن جابىلادى.
ءتيىستى نورما زاڭ جوباسىندا قامتىلىپ، ءماجىلىس قاراۋىنا ەنگىزىلدى. بۇل تۋرالى دەنساۋلىق ساقتاۋ ۆيسە-مينيسترى – باس مەملەكەتتىك سانيتاريالىق دارىگەر ايجان ەسماعامبەتوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بالالار دەمالاتىن لاگەرلەردىڭ ماسەلەسىنە توقتالساق، ولاردىڭ 80 پايىزى شاعىن بيزنەسكە تيەسىلى. 2020 جىلدان باستاپ شاعىن بيزنەستى تەكسەرۋگە موراتوريي ەنگىزىلدى. بۇل تۇرعىدا لاگەرلەر 2020 جىلدان بەرى جوسپارلى تۇردە تەكسەرىلمەدى. ولار تەك جوسپاردان تىس تەكسەرىلەدى. اتاپ ايتقاندا، ادامنىڭ ءومىرى مەن دەنساۋلىعىنا ءقاۋىپ تونگەن ناقتى فاكتى بولسا عانا جوسپاردان تىس تەكسەرۋ وتەدى. تەك وسى جاعدايدا پروكۋراتۋرا جوسپاردان تىس تەكسەرۋ جۇرگىزۋگە مۇمكىندىك بەرەدى. ءبىز نە ىستەدىك؟ ءماجىلىس قاراۋىنا ءتيىستى زاڭ جوباسى ەنگىزىلىپ، بۇل قۇجاتقا سايكەس باقىلاۋدىڭ جاڭا ءتۇرىن ەنگىزىپ جاتىرمىز. سانيتارلىق نورمالار مەن ەرەجە تالاپتارى ساقتالماعان جاعدايدا، ولاردىڭ قىزمەتىن توقتاتۋعا مۇمكىندىك بەرەتىن تەرگەۋ، جەدەل ارەكەت ەتۋ شارالارى سياقتى باقىلاۋ نورماسى ەنگىزىلىپ جاتىر»، - دەدى ا. ەسماعامبەتوۆا ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا.