الماتىلىق قاجد-دا ەپيدەميولوگيالىق جۇمىستىڭ قورىتىندىسى تالقىلاندى

الماتى قالاسىنداعى جيتس الدىن الۋ جانە وعان قارسى كۇرەس ورتالىعىنىڭ دارىگەرلەرى مەن الماتى قالاسى بويىنشا قاجد قىزمەتكەرلەرى ءبىرىنشى جارتى جىلدىعىنداعى بىرلەسكەن جۇمىستاردىڭ قورىتىندىسىن شىعاردى.

سوڭعى التى ايدا اتقارىلعان جۇمىستاردىڭ ناتيجەلەرىمەن جيتس ورتالىعىنىڭ ەپيدەميولوگى ب.تابينوۆا تانىستىردى. اتالعان جيىندا قىلمىستىق-اتقارۋ جۇيەسى دەپارتامەنتىنە قاراستى مەكەمەلەردە ادامنىڭ يممۋنتاپشىلىق ۆيرۋسى ينفەكسياسىنىڭ تومەندەۋ تەندەنسياسىن اتاپ ءوتتى. ەپيدەميولوگ دارىگەر 2022 جىلمەن سالىستىرعاندا اتالعان اۋرۋ دەڭگەيىنىڭ تومەندەۋىنە تەستىلەۋ جۇمىسىنىڭ دا وڭ ىقپال ەتكەنىن تىلگە تيەك ەتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.

«ارنايى كونتينگەنتتىڭ اراسىندا اۋرۋدىڭ الدىن الۋعا باعىتتالعان جۇمىستاردىڭ جۇيەلى جۇرگىزىلۋىنىڭ دە ناتيجەسى مول. اتاپ ايتقاندا، دارىگەرلەر قىزمەتكەرلەر مەن سوتتالعاندارعا ۆيرۋستىڭ تارالۋ جولدارى مەن ودان قورعانۋ شارالارى تۋرالى ءدارىس وقيدى، اقپاراتتىق جانە وقۋ ماتەريالدارىن تاراتامىز»، – دەيدى قاجد №11 مەكەمەسىنىڭ سانيتارلىق-ەپيدەميالوگيالىق قاداعالاۋ توبىنىڭ مامانى س.تالاسبايەۆ.

جارتىجىلدىق جۇمىستى قورىتىندىلاۋ كەڭەسىنە قاتىسقاندار ايتۆ-عا تەستىلەۋدى جانە سوتتالعانداردى بوساتۋ الدىندا باقىلاۋدى كۇشەيتۋ قاجەتتىگىن حابارلادى. سونداي-اق جيتس ورتالىعىنىڭ ەپيدەميولوگ دارىگەرى ا.الىمبەكوۆا تۋبەركۋلەزدىڭ حيميوپروفيلاكتيكاسى جانە ايتۆ جۇقتىرعان ادامداردىڭ انتيرەتروۆيرۋستىق تەراپياعا بەيىلدىلىگىن ارتتىرۋ بويىنشا ۇسىنىستارىن ايتتى.