سانيتار دارىگەرلەر قازاقستان حالقىنا ۇندەۋ جاسادى

ۇندەۋ قۇربان ايتقا قاتىستى.

سانيتاريالىق-ەپيدەميولوگيالىق باقىلاۋ كوميتەتى قاسيەتتى «قۇربان ايت» مەرەكەسى قارساڭىندا حالىققا ۇندەۋ جاسادى، دەپ حابارلايدى Almaty-akshamy.kz

قاسيەتتى «قۇربان ايت» مەرەكەسى قارساڭىندا اسا ءقاۋىپتى جۇقپالى اۋرۋلاردىڭ، جاپپاي تاماقتان ۋلانۋدىڭ جانە مال ساتۋ، قۇربان شالۋ كەزىندە ءجىتى ىشەك ينفەكسيالارىنىڭ الدىن الۋ ماقساتىندا مىناداي تالاپتاردىڭ ساقتالۋى تۋرالى ەسكە سالامىز.

مال ساتۋ، سويۋ بەكەتتەرىندە:

قۇرباندىققا شالىناتىن مالداردى ساتۋ مەن سويۋ ارنايى ورىنداردا، ءتيىستى ۆەتەرينارلىق قۇجاتتارمەن (ۆەتەرينارلىق پاسپورت، قۇلاق سىرعالارى) جۇزەگە اسىرۋ؛

مال سويۋ ورىندارىندا سانيتاريالىق-ەپيدەميولوگيالىق تالاپتاردى قاتاڭ ساقتاۋ (سۋمەن جابدىقتاۋ، كارىز جۇيەلەرىنىڭ بولۋى)، مال سويۋ بارىسىندا شىققان قالدىقتاردى ۋاقىتىلى زالالسىزداندىرىپ، شىعارۋ؛

قىزمەتكەرلەر مەديسينا كىتاپشاسىن الۋى، جەكە باس گيگيەناسىن قاتاڭ ساقتاۋى.

ءۇي جاعدايىندا:

قوناقتاردىڭ قول جۋۋىنا جاعدايدىڭ بولۋى؛

تاماقتانۋ بولمەلەرىن تۇراقتى جەلدەتۋ؛

شيكىزات پەن تاماق ونىمدەرىن قاۋىپسىزدىگىن كۋالاندىراتىن تاۋاردىڭ ىلەسپە قۇجاتتاماسى بار ورىنداردان ساتىپ الۋ؛

ءۇي جاعدايىندا دايىندالعان كونسەرۆى (سالاتتار، ەت، قۇس، بالىق، ساڭىراۋقۇلاق جانە ت.ب.) ونىمدەرىن پايدالانار الدىندا 15-20 مينۋت تەرميالىق وڭدەۋدەن وتكىزۋ؛

ەت، قۇس، جۇمىرتقادان تەز بۇزىلاتىن تاعامدار، پاشتەتتەر، اسپازدىق ونىمدەر، كرەمى بار كونديتەرلىك ونىمدەر، سالاتتاردى دايىنداعاننان كەيىن بىردەن قولدانۋ، ساقتاۋ تالابى بۇزىلعاندا، كەلەسى كۇنى پايدالانباۋ؛

تەرىنىڭ ءىرىڭدى اۋرۋلارى، ءىرىڭدى كەسىلگەن جاراقاتتار، كۇيىكتەر، جارالار، جوعارى تىنىس الۋ جولدارىنىڭ اۋرۋى بولعان جاعدايدا تاماق ازىرلەۋگە قاتىسپاۋ كەرەك.

قوعامدىق تاماقتانۋ نىساندارى مەن مەشىتتەردە:

سۋىق، ىستىق سۋمەن جابدىقتاۋ، سۋ تارتۋمەن قامتاماسىز ەتۋ، كەلۋشىلەر مەن پەرسونالعا ارنالعان راكوۆينالار، قول جۋۋ، ءسۇرتۋ جانە (نەمەسە) كەپتىرۋ قۇرىلعىلارىمەن جانە قۇرالدارمەن جاراقتاۋ؛

جەلدەتۋ، اۋا باپتاۋ جۇيەلەرىنىڭ ۇزدىكسىز جۇمىس ىستەۋى؛

تاۋاردىڭ قاۋىپسىزدىگىن قامتاماسىز ەتەتىن ىلەسپە قۇجاتتاماسىنىڭ بولۋى؛

تاماقتانۋ وبەكتىسىنىڭ شارۋاشىلىق ايماعىندا سانيتاريالىق-گيگيەنا جاعدايىن قامتاماسىز ەتۋ؛

پەرسونالدا ارنايى كيىمنىڭ، مەديسينا تەكسەرۋىنەن، گيگيەنالىق وقىتۋدان وتكەن جانە جۇمىسقا رۇقساتى بار جەكە مەديسينا كىتاپشاسىنىڭ بولۋى؛

كۇن سايىن جۇمىس اۋىسىمى باستالار الدىندا پەرسونالدى مەديسينالىق قاراپ-تەكسەرۋ.

"ەسكە سالا كەتەيىك، جوعارىدا اتالعان سانيتاريالىق-ەپيدەميولوگيالىق تالاپتاردى ساقتاماۋ حالىق اراسىندا تاماقتان ۋلانۋ جانە اسا ءقاۋىپتى، ءجىتى ىشەك ينفەكسياسى جاعدايلارىنىڭ تۋىنداۋىنا ىقپال ەتۋى مۇمكىن"، - دەپ ەسكەرتتى كوميتەت ماماندارى.