قازاقستاندا ۇلتتىق حالىق ساناعىنا دايىندىق ءجۇرىپ جاتىر.
2021 جىلعى ۇلتتىق ساناعىنىڭ الدىندا 1-30 ماۋسىم ارالىعىندا ينتەرۆيۋەرلەر (تىركەۋشىلەر) ءاربىر ەلدى مەكەن بويىنشا تۇرعىن جايلار، تۇرعىن ۇيلەر (تۇرعىن جاي عيماراتتارى) جانە تۇرعىن ءۇي رەتىندە پايدالانىلاتىن تۇرعىن ەمەس ورىنداردىڭ بارلىعىن ارالاپ، ولاردىڭ ءتىزىمىن جانە تۇراقتى تۇراتىن تۇرعىنداردىڭ سانىن ناقتىلايتىن بولادى، دەپ حابارلادى Almaty-akshamy.kz ق ر ستاتيستيكا كوميتەتىنە سىلتەمەلەپ
الايدا تۇرعىندار اراسىندا ساناقتىڭ ءبىرىنشى كەزەڭى بويىنشا تۇسىنىسپەۋشىلىكتەر تۋىنداپ وتىر. وسىعان بايلانىستى ۇلتتىق ستاتيستيكا بيۋروسى تۇرعىنداردى حالىق ساناعىنا بەلسەندى قاتىسۋعا شاقىرادى. ايتا كەتەيىك، حالىق ساناعىنىڭ 1ء-شى كەزەڭىنىڭ باستى ماقساتى – مەكەنجايلار مەن وندا تۇراتىن ازاماتتاردىڭ سانىن ناقتىلاۋ.
ءبىرىنشى كەزەڭدە جاسالاتىن تىزىمدەر قالالىق جانە اۋىلدىق ەلدى مەكەندەردىڭ اۋماقتارىن نۇسقاۋشىلىق جانە ەسەپ ۋچاسكەلەرىنە دۇرىس ءبولۋ جانە تۇرعىن سانىن ەكىنشى كەزەڭ ساناعىنا، ياعني اۋدانداستىرۋ ءۇشىن ساناق قىزمەتكەرىنە جۇكتەمە كولەمىنە سايكەس بىركەلكى ءبولۋ ءۇشىن قاجەت. سونداي-اق، بۇل ساناق كەزىندە تۇرعىندار ەسەبىن تولىقتاي قامتۋعا مۇمكىندىك بەرەدى.
1ء-شى ماۋسىمنان باستاپ بارلىعى 5 405 ينتەرۆيۋەر جانە 773 نۇسقاۋشى-باقىلاۋشى قاجەتتى مالىمەتتەردى جيناۋدا.
«تۇرعىنداردىڭ نازارىنا! نىسانداردى ارالاۋ كەزىندە ينتەرۆيۋەرلەر وزدەرىن تانىستىرىپ، تەگىن ايتۋلارى جانە ساناق ينتەرۆيۋەرىنىڭ كۋالىگىن كورسەتۋى كەرەك، كەلۋىنىڭ ماقساتىن ناقتى جانە قىسقاشا ءتۇسىندىرىپ، سول ءۇي-جايدا تۇراقتى (ادەتتە) تۇراتىنداردىڭ مەكەن-جايلارىن جانە سانىن سۇرايدى»،– دەلىنگەن رەسمي حابارلامادا.
ەسكە سالا كەتەيىك، 2021 جىلدىڭ ۇلتتىق ساناعىنىڭ نەگىزگى كەزەڭى 1 قىركۇيەكتەن 30 قازانعا دەيىنگى ارالىقتا وتەدى. وعان ونلاين رەجيمىندە دە، سونداي-اق، ءداستۇرلى تاسىلمەن دە قاتىسۋعا بولادى.