قازاقستاندا 1 قىركۇيەك پەن 30 قازان ارالىعىندا وتكەن 2021 جىلعى ءۇشىنشى ۇلتتىق حالىق ساناعى اياقتالدى.
31 قازان مەن 8 قاراشا ارالىعىندا باقىلاۋ تاڭدامالى ارالاۋ كەزەڭى بولادى، دەپ حابارلايدى Almaty-akshamy.kz الماتى قالاسى بويىنشا ستاتيستيكا دەپارتامەنتىنىڭ باسپا ءسوز قىزمەتىنە سىلتەمە جاساپ.
1 قاراشاداعى جاعداي بويىنشا حالىق ساناعى 19 450 179 ادامدى نەمەسە رەسپۋبليكا حالقىنىڭ 100،2%-ىن قامتىدى (1 تامىزدا حالىقتىڭ سانى 19 029 507 ادامدى قۇرادى). الماتى بويىنشا 652 195 ادام ونلاين جانە 1 559 023 ادام وفلاين فورماتتاردا ءوتىپ، 110،3 پايىزدى قۇرادى. ەستەرىڭىزگە سالا كەتەيىك، حالىق ساناعى 2020 جىلعى دۇنيەجۇزىلىك حالىق جانە تۇرعىن ءۇي قورىنىڭ اياسىندا وتكىزىلۋدە. 2021 جىلى قازاقستانمەن قاتار تاعى 60 مەملەكەت حالىق ساناعىنان ءوتتى.
ساناق اياقتالعاننان كەيىن الەۋمەتتىك جەلىلەردە «ساناق ءبىتتى، ءبىراق مەنى تىركەگەن جوق ...» دەگەن نەگاتيۆتى پىكىرلەر پايدا بولا باستادى. 30 كۇن بويى 2287 ساناق سۇحباتشىلارى كۇن سايىن قاتاڭ بەلگىلەنگەن ادىستەمە بويىنشا ءوز ۋچاسكەلەرىن ارالادى، مۇمكىن سۇحباتشىلار ءسىزدى ۇيدە تاپپاعان شىعار. كوپتەگەن پاتەرلەر يەلەرى ساناق قىزمەتكەرلەرىنە ەسىكتەرىن اشپادى، ولار ءبىر پاتەرگە بىرنەشە رەت كەلۋگە ءماجبۇر بولدى.
قازىرگى تاڭدا ساناقتان ۋاقىتىلى وتپەگەن تۇرعىنداردىڭ باسىم بولىگى بەلسەندىلىك تانىتىپ، ازاماتتىق بورىشىن وتەپ، ءوز بەتىنشە ءوتىپ جاتىر، ويتكەنى www.sanaq.gov.kz سايتى باقىلاۋ كەزەڭىنىڭ سوڭىنا دەيىن جۇمىس ىستەيدى. سونىمەن قاتار، ساناقتان وتە الماعان تۇرعىندار Egov ەلەكتروندى ۇكىمەت پورتالىنداعى سىلتەمە بويىنشا جانە «ايتۋ» ءموبيلدى قوسىمشاسىن پايدالانىپ وتە الادى. كەيبىر تۇرعىندار كولل-سەنترگە قوڭىراۋ شالىپ، ءوز ۇيىنە سۇحباتشىلاردى شاقىرادى. ستاتيستيكا دەپارتامەنتى قالا تۇرعىندارىنا ءاردايىم كومەكتەسۋگە دايىن، ساناقشىلار دەرەۋ سول مەكەنجايلارعا بارادى. وسىعان وراي، جاڭادان شىققان حەيتەرلەر پىكىر جازۋمەن ۋاقىت جوعالتپاي، ساناق سايتىن كورىپ شىعۋعا نەمەسە جاي عانا سۇحباتشى-ساناقشىنى ۇيىنە شاقىرۋدى ۇسىنامىز.
«مەملەكەتتىك ستاتيستيكا تۋرالى» زاڭنىڭ «ۇلتتىق ساناقتار تۋرالى» 21-بابىندا ۇلتتىق ساناقتار كەزىندەگى باستاپقى ستاتيستيكالىق دەرەكتەردى رەسپوندەنتتەر مىندەتتى تۇردە جانە اقىسىز تۇردە بەرەدى دەپ كورسەتىلگەن. سونىمەن قاتار، قازاقستان رەسپۋبليكاسىنىڭ زاڭناماسىندا باستاپقى ستاتيستيكالىق دەرەكتەردى، ونىڭ ىشىندە حالىق ساناعى كەزىندە ۇسىنباعانى ءۇشىن جاۋاپكەرشىلىك كوزدەلگەن. بۇل الەمدىك تاجىريبە. قازاقستان رەسپۋبليكاسىندا بۇل نورما «اكىمشىلىك قۇقىق بۇزۋشىلىق تۋرالى» قازاقستان رەسپۋبليكاسى كودەكسىنىڭ 497-بابىندا جازىلعان.
ساناق حالىقتى قاراپايىم ساناۋ ەمەس، ساناق ساۋالناماسىنا كوپتەگەن اسپەكتىلەر ەنگىزىلگەن. قازاقستاندا حالىق ساناعى ءار 10 جىل سايىن جۇرگىزىلەتىندىكتەن، الىنعان مالىمەتتەر كوپتەگەن مەكەمەلەر الداعى ون جىل ىشىندە ءوز قىزمەتىندە پايدالاناتىن وراسان زور اقپارات كوزىنە اينالادى. تۇرعىندار ەنگىزگەن كورسەتكىشتەر نەگىزىندە مەملەكەت حالىقتىڭ ساندىق قۇرامىن عانا ەمەس، سونىمەن بىرگە «ساپالىق» قۇرامىن دا انىقتايدى، بەلگىلى ءبىر وبلىستىڭ، قالانىڭ، اۋىلدىڭ ينفراقۇرىلىمىنىڭ دامۋىن بولجايدى جانە جوسپارلايدى. مىسالى، حالىق سانىنىڭ ءوسۋى بايقالاتىن ايماقتاردا قوسىمشا مەكتەپتەر، اۋرۋحانالار، پەرزەنتحانالار، قالا قۇراۋشى كاسىپورىندار سالۋ جوسپارلانادى.
حالىق ساناعى اياقتالعاننان كەيىن وسى اپتادا ينسترۋكتور-باقىلاۋشىلار ينتەرۆيۋەرلەرمەن بىرلەسە وتىرىپ، ءاربىر ەسەپتىك ۋچاسكەلەردىڭ 10 پايىزىن قامتيتىن تۇرعىن ۇيلەردەگى رەسپوندەنتتەرگە ساۋالناما جۇرگىزەدى. بۇل كەزەڭ 8 قاراشاعا دەيىن جالعاسادى جانە 2021 جىلعى حالىق ساناعى كەزىندە حالىقتى تىركەۋدىڭ تولىقتىعىن جانە دەرەكتەر ساپاسىنىڭ دۇرىستىعىن تەكسەرۋ ماقساتىندا جۇزەگە اسىرىلادى. سونىمەن قاتار بۇل شارا سۇحباتشىلاردىڭ ءاربىر تۇرعىن ۇيگە بارعانىن جانە ساۋالنامانىڭ بارلىق تۇرعىندار ءۇشىن تولتىرىلعانىنا سەنىمدى قامتاماسىز ەتەدى.
«قانداي دا ءبىر سەبەپتەرمەن ساناقتان وتپەي قالعان تۇرعىندار بولسا، حابارلاسىڭىز، ءبىز ءسىزدى وتكىزەمىز. ساناق ءبولىمىنىڭ تەلەفونى 8 (727) 330-89-16»، - دەلىنگەن قالالىق ستاتيستيكا دەپارتامەنتى تاراتقان مالىمەتتە.