ۇكىمەتتىڭ ارنايى قاۋلىسى جاريالاندى. «سامۇرىق-قازىنا» ءۇاق» اق جىل سايىن «قازاقستان حالقىنا» قوعامدىق قورىنا تازا تابىسىنىڭ كەمىندە 7%-ىن اۋدارىپ وتىراتىن بولادى.
قاراجاتتى ءبولۋ ءتارتىبىن رەتتەيتىن ەرەجەلەر ق ر ۇكىمەتىنىڭ قاۋلىسىمەن بەكىتىلدى، دەپ حابارلايدى اlmaty-akshamy.kz Azattyq Ruhy-نا سىلتەمە جاساپ.
قاۋلىعا سايكەس، «قازاقستان حالقىنا» قورى اۋدارىلعان قاراجاتتى بەلگىلەنگەن ماقساتقا باعىتتاۋعا ءتيىس. ايتا كەتۋ كەرەك، بۇگىندە قور التى باعىت بويىنشا 25-تەن استام قايىرىمدىلىق باعدارلاماسىن جۇزەگە اسىرادى، ولاردىڭ ىشىندە مەديسينا، ءبىلىم بەرۋ، سپورت، مادەنيەت، الەۋمەتتىك قولداۋ، سونداي-اق توتەنشە جاعدايلار كەزىندە كومەك كورسەتۋ سالالارى بار.
«اتاپ ايتقاندا، ناۋقاستاردى دارى-دارمەكپەن، جاستار مەن مۇگەدەكتىگى بار بالالاردى يننوۆاسيالىق پروتەزدىك-ورتوپەديالىق بۇيىمدارمەن قامتاماسىز ەتۋ، اۋىلدا نەگىزگى مەكتەپتەر، ەرتە ارالاسۋ ورتالىقتارى، اۋتيزممەن اۋىراتىن بالالارعا ارنالعان ورتالىقتاردى قۇرۋ، مەديسينالىق ۇيىمداردى زاماناۋي قۇرالدارمەن جابدىقتاۋ، اۋىل مەكتەپتەرىنىڭ تۇلەكتەرىنە جانە حالىقتىڭ الەۋمەتتىك وسال توپتارىنا كىرەتىن وقۋشىلارعا ءبىلىم گرانتتارىن ۇسىنۋ باعدارلامالارى بار»، - دەلىنگەن ۇكىمەتتىڭ باسپا ءسوز قىزمەتى تاراتقان حابارلامادا.
ەسكە سالا كەتەيىك، جىل سايىن «سامۇرىق-قازىنا» قورىنىڭ تازا تابىسىنىڭ كەم دەگەندە 7%-ىن «قازاقستان حالقىنا» قوعامدىق قورىنا اۋدارۋ تۋرالى باستامانى مەملەكەت باسشىسى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى حالىققا جولداۋىندا ايتقان بولاتىن.