ساموكاتشىلاردىڭ جول قوزعالىسىن رەتتەيتىن زاڭ كۇشىنە ەندى

30 تامىزدان باستاپ، جول ەرەجەسىن بۇزعان ساموكاتشىلارعا ايىپپۇل سالىنا باستايدى.

پرەزيدەنت 29 ماۋسىم كۇنى «جول قوزعالىسىن ۇيىمداستىرۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعان بولاتىن. اتالعان زاڭ بۇگىن كۇشىنە ەندى، دەپ حابارلايدى Almaty-akshamy.kz.

وسى زاڭ ارقىلى «جول قوزعالىسى تۋرالى» زاڭعا تۇزەتۋلەر ەنگىزىلدى، ولار كولىك قۇرالدارىنىڭ جاڭا تۇرلەرىنىڭ – «ەلەكتر سكۋتەرى» مەن «شاعىن ەلەكتر كولىك قۇرالدارىنىڭ» مارتەبەسىن انىقتادى. شاعىن ەلەكتر كولىگىنە گيروسكۋتەرلەر، سيگۆەيلەر، مونوكولىكتەر، ەلەكتر سكەيتبوردتار جانە باسقا تۇرلەرى جاتادى.

ال، ەلەكترلىك سكۋتەر – ەكى نەمەسە ءۇش دوڭگەلەگى بار، ەلەكتر قوزعالتقىشىن پايدالانۋ ارقىلى ءبىر ادامنىڭ قوزعالۋىنا ارنالعان، ورىندىعى جوق، ماكسيمالدى كونسترۋكتيۆتىك جىلدامدىعى ساعاتىنا 25 شاقىرىمنان اسپايتىن ەلەكترلى كولىك قۇرالى.

قولدانىستاعى زاڭنامادا وسى زاڭبۇزۋشىلىقتار ءۇشىن جاۋاپكەرشىلىك قاراستىرىلعان. وسىلايشا، قۇقىقبۇزۋشىلىقتار انىقتالسا، ولار اقبتك 593-بابى (5 اەك ايىپپۇل) نەمەسە اقبتك 620-بابى (ەسكەرتۋ نەمەسە 3 اەك ايىپپۇل) بويىنشا جاۋاپقا تارتىلادى.

سونىمەن بىرگە، ساموكاتتاردى جالعا بەرەتىن كيكشەرينگتىك كومپانيالار جالپى «جوسىقسىز كليەنتتەر ءتىزىمىن» قۇرۋدى ۇسىنىپ وتىر. جول قوزعالىسى ەرەجەلەرىن، جولاۋشىلار مەن جۇكتەردى تاسىمالداۋ ەرەجەلەرىن بۇزاتىن، سكۋتەردى دۇرىس ەمەس جەردە قالدىراتىن پايدالانۋشىلارعا بارلىق كومپانيا ءبىر مەزگىلدە قىزمەت كورسەتۋدەن باس تارتۋى مۇمكىن.