ەلىمىزدە ەلەكتر ساموكاتتارعا بايلانىستى ءبىرقاتار زاڭ قابىلداندى. اتالعان زاڭ جوباسىنا قالا تۇرعىندارى مەن ساموكاتتى جالعا بەرەتىن كاسىپورىندارىنىڭ باسشىلىعى ەكىۇشتى پىكىردە، دەپ حابارلايدى Almaty-akshamy.kz.
تۇرعىندار ساموكات جۇرگىزۋشىلەرىنىڭ ءجيى جول كولىك اپاتىنا ۇشىراپ، زاڭ بۇزۋشىلىق ارەكەتتەرگە باراتىنىن اتاپ ءوتتى.
«كوشەدە ارتىمىزعا جالتاقتاپ، قورقىپ جۇرەمىز. ساموكات پەن موپەدكە مىنگەندەر اياق استىنان، جوعارعى جىلدامدىقپەن كەلە جاتادى. مەنىڭشە، اتالعان زاڭ جوباسى تەزىرەك قابىلدانىپ، ساموكاتشىلاردى ءبىر ىزدىلىككە تۇسىرسە. سەبەبى، جولدا كىشكەنتاي بالالار دا جۇرەدى، ولاردىڭ قاۋىپسىزدىگىنە الاڭدايمىز. ارنايى شلەممەن، ارنايى جولاقتارمەن جۇرگەنىن قالايمىز»، – دەيدى نازگۇل ەرجان ەسىمدى قالا تۇرعىنى.
كۇنى كەشە، الماتىدا ساموكات جۇرگىزۋشىسى موتوسيكلمەن سوعىسىپ مەرت بولدى. قايعىلى وقيعا تۇندە تيميريازيەۆ پەن ساتبايەۆ كوشەلەرىنىڭ اراسىندا سەيفۋللين داڭعىلىنىڭ بويىندا بولعان.
Yamaha موتوسيكلىن تىزگىندەگەن جۇرگىزۋشى سەيفۋلين داڭعىلىنىڭ بويىمەن وڭتۇستىك باعىتتا، ال ساموكاتتى جالعا العان تۇرعىن سولتۇستىككە قاراي كەتىپ بارا جاتقان. ساموكاتشى پوليتەحنيچەسكايا كوشەسىنە قاراي سولعا بۇرىلماق بولعان. ءبىراق اراقاشىقتىقتى دۇرىس ەسەپتەمەي، موتوسيكلدىڭ الدىندا بۇرىلعان. قارسى بەتتەن كەلگەن موتوسيكل جۇرگىزۋشىسى جوعارى جىلدامدىقپەن ونى قاعىپ كەتكەن.
«قازاقستاننىڭ ينفراقۇرىلىمى ۆەلوسيپەد جولاعىنا 500 شاقىرىم عانا بەرەدى. سوندىقتان دا ساموكاتتاردى جولدىڭ وڭ جولاعىمەن 18-گە تولعان، جۇرگىزۋشى كۋالىگى بار، قورعاۋ شلەمى بار جۇرگىزۋشىلەر ايداي الادى. قالعان جەرلەردە، مىسالى، تروتۋاردا جۇرەتىن بولسا، باسىمدىق جاياۋ جولاۋشىلارعا بەرىلەدى. بيىل 1 قاڭتاردان باستاپ ساموكات جۇرگىزۋشىلەرىنىڭ قاتىسۋىمەن 44 وقيعا تىركەلدى. بىلتىر 1 ادام قايتىس بولدى. وسىنداي ستاتيستيكا بار»، – دەپ بايانداعان ىشكى ىستەر ءمينيسترى مارات احمەتجانوۆ.
دەگەنمەن، اتالعان زاڭ جوباسى ساموكاتتى جالعا بەرەتىن كومپانيالاردىڭ تابىسىنا زيان كەلتىرمەك. بيزنەسى ەندى عانا قارقىن الىپ، تابىس كوزىنە كەنەلە باستاعان بۇل زاڭ اياققا تۇساۋ كەلتىرەتىنىن اتاپ ءوتتى.
«ماسەلەن، ءبىر عانا «Jet Sharing» كومپانياسىنىڭ جالپى ساتۋ كولەمى 2 جىلدا ەكى ەسەگە وسكەن. كاسىپورىن 1200-دەن استام ادامدى جۇمىسپەن قامتاماسىز ەتىپ، وتكەن جىلدىڭ وزىندە ىشكى قازىناعا 458 ميلليون تەڭگەدەن استام قاراجات اۋداردى. دەپۋتاتتاردىڭ جۇرگىزىۋشى كۋالىگى بولۋ كەرەك دەگەن زاڭى ءبىزدى تاڭ قالدىردى. مەنىڭ ويىمشا، ساموكاتتى ايداۋ ءۇشىن 3-4 كۇن ۋاقىت كەتەدى. ول ءۇشىن ارنايى ءبىر بەلگىلەردى جاتتاپ الۋ قاجەت ەمەس. ال باس كيىمنىڭ دۋىلعاسى اپات بولعان كەزدەردە كومەتەسپەيدى. مەنى تاعى ءبىر تاڭ قالدىرعاندارى موپەدشىلەرگە نەگە زاڭ ءالى قاراستىرىلماعان؟ جول اپاتىن ءجيى ۇشىراتاتىن سولار عوي»، – دەيدى «Jet Sharing» كومپانياسىنىڭ باسشىسى مۋسالاۆا اليبەكوۆ.
قالا جاستارىنىڭ پىكىرىنشە، بۇل زاڭ وتە قاتاڭ. ولار ساموكاتتى كوبىنە قىزىق ءۇشىن 1 ساعاتقا جەتپەيتىن ۋاقىت ايدايتىندارىن ايتادى. ال جۇرگىزۋشى كۋالىگىن الىپ جۇرۋگە كوبىسىنىڭ جاعدايى، ۋاقىتى جەتپەيدى.
- جاياۋ جۇرگىنشىلەر جولاعىندا موپەدپەن جۇرگەندەردى دە كوزىمىز شالادى. ولار جىلدامدىقتى اسىرىپ جۇرەدى. نەگە ولارعا زاڭ قابىلداماسقا؟!. مەنىڭ ويىمشا، ساموكاتتى كۇندەلىكتى قولداناتىندار جۇرگىزۋشى كۋالىگىن الماسا، جاستاردىڭ شاماسى كەلمەيدى. ونسىز دا ساموكاتقا وتىرعانعا 1 ساعاتقا 4000 تگ كەتەدى. بۇل كىمنىڭ بولماسىن قالتاسىنا اۋىر. ستۋدەنتتەر، وقۋشىلار ساموكاتتى تەك قىزىق ءۇشىن ايدايدى. سول سەبەپتەن بۇل زاڭ تىم قاتال دەپ ويلايمىن، – دەيدى اقبوتا نۇرمولدا ەسىمدى ستۋدەنت.