شىعىس قازاقستان وبلىسىندا ەكى كورشى ءبىر ساماۋرىن ءۇشىن سوتتاستى.
ەر ادام كورشىسىنىڭ ساماۋرىنىن پايدالانۋعا سۇراپ، كەيىن ونى جوعالتىپ العان. باسىندا نە دەپ ايتارىن بىلمەي، كورشىسىنەن قاشىپ ءجۇرىپتى. ءتىپتى، قوڭىراۋىنا جاۋاپ بەرمەگەن. ونىڭ ارەكەتىنە شىداماعان ايەل ونى سوتقا بەرگەن، دەپ حابارلايدى aqshamnews.kz Astana TV-عا cىلتەمە جاساپ.
"شىعىس قازاقستان وبلىستىق سوتىنىڭ مالىمەتىنشە، ارىزدانۋشى ءوزىنىڭ تانىسىنا وتباسىلىق قۇندىلىققا اينالعان ساماۋرىنىن پايدالانۋعا بەرە تۇرادى. ءبىراق تانىسى زاتتى قايتارمايدى، ءتىپتى سويلەسۋدەن قاشىپ، كوزگە تۇسپەي جۇرگەن. ساماۋرىننىڭ يەسى سوتقا شاعىمدانعان. ايتۋىنشا، ول وتباسىلىق قۇندى جادىگەردى اكە-شەشەسى مەن اجەسىنە ايتپاي، سۇراعان كورشىسىنە بەرىپ، قايتارادى عوي دەپ جۇرگەن. جاۋاپكەر سوتتا ساماۋرىنعا مەرەكە كەزىندە شاي قويىپ، سودان جوعالىپ كەتكەنىن ايتقان. تويعا كەلگەندەردىڭ بارىنەن سۇراپ شىققان، ءبىراق تاپپاعان"، - دەلىنگەن حابارلامادا.
سوتتا ەكى تاراپ مەدياسيالىق كەلىسىمگە كەلدى. جاۋاپكەر ارىزدانۋشىعا جوعالعان ساماۋرىنمەن بىردەي ساماۋرىن ساتىپ الىپ بەرەتىن بولدى.