ولار 1،5 ملرد تەڭگە سالىق تولەگەن.
«التىن وردا» بازارىندا ساۋدا جاسايتىن 2993 ازامات كاسىپكەر رەتىندە تىركەلدى. بۇل تۋرالى مەملەكەتتىك كىرىستەر كوميتەتى مالىمدەدى، دەپ حابارلايدى Almaty-akshamy.kz قازاقاپاراتقا سىلتەمە جاساپ.
«مەملەكەت باسشىسىنىڭ الماتى وبلىسىنداعى «التىن وردا» بازارىنىڭ قىزمەتىن رەتكە كەلتىرۋگە قاتىستى تاپسىرماسىنا سايكەس ءبىرقاتار باقىلاۋ شارالارى جۇزەگە استى. ساۋدا ورتالىعىندا جۇمىس ىستەيتىن 2993 ازامات كاسىپكەر رەتىندە تىركەلدى. ونىڭ ىشىندە اقپاندا - 1371، ناۋرىزدا - 1443، ساۋىردە 179 ادام جەكە كاسىپكەرلىك قۇجاتىن الدى. بۇرىننان تىركەلىپ، جۇمىس ىستەپ وتىرعان جەكە كاسىپكەرلەر مەن زاڭدى تۇلعالاردى قوسا ەسەپتەسەك، قازىرگى ۋاقىتتا جالپى سانى 3 324 سۋبەكتى بار. بۇرىن بازار اۋماعىندا ساۋدا جاسايتىن 331 سالىق تولەۋشى ەسەپتە تۇرعان»، - دەپ جازدى ۆەدومستۆودان.
تاعى بەلگىلى بولعانى، باقىلاۋ شارالارى بازاردى جالعا الۋشى «Altyn Orda QazTrade Ltd» ج ش س جانە بازار يەسى «KURYLYS LTD» - «كۋرىلىس لتد» جشس-نا قاتىستى جۇرگىزىلگەن. قولدانىلعان شارالاردىڭ ناتيجەسىندە بيۋدجەتكە 1،5 ملرد تەڭگە سالىق تولەندى، ونىڭ ىشىندە «Altyn Orda QazTrade Ltd» ج ش س 1،4 ملرد تەڭگە سالىق تولەگەن، «KURYLYS LTD» - «كۋرىلىس لتد» ءجشس-ى – 92،3 ملن.تەڭگە بيۋدجەتكە اۋدارعان.
«ودان بولەك، قولدانىلعان شارانىڭ ناتيجەسىندە «Altyn Orda QazTrade Ltd» ج ش س مەن «KURYLYS LTD» - «كۋرىلىس لتد» جشس-ىنا كامەرالدىق باقىلاۋ بويىنشا جالپى سوماسى 1،3 ملرد تەڭگەگە حابارلامالار قويىلىپ، 1،1 ملرد تەڭگە قوسىمشا سالىق ەسەپتەلدى. قازىرگى ۋاقىتتا ونىڭ 650 ملن تەڭگەسى بيۋدجەتكە ءوندىرىلدى»، - دەپ تولىقتىردى كوميتەتتەن.
سونىمەن قاتار، قازىرگى ۋاقىتتا «Altyn Orda QazTrade Ltd» ج ش س مەن بازار يەسى «KURYLYS LTD» - «كۋرىلىس لتد» جشس-نا قاتىستى سالىقتىق تەكسەرۋلەر جۇرگىزىلۋدە.