سالىق سوتقا سۇيرەيدى

الماتىدا بىلتىر 16،6 ملرد تەڭگە كولىك سالىعى ەسەپتەلگەن.

كولىك سالىعىن تولەمەگەندەردىڭ ءىسى سوتقا جولدانادى، دەپ حابارلايدى Almaty-akshamy.kz

الماتى قالاسى بويىنشا مەملەكەتتىك كىرىستەر دەپارتامەنتى وندىرىستىك ەمەس تولەمدەر باسقارماسىنىڭ باسشىسى قۋانىش تۇمەنبايەۆتىڭ ايتۋىنشا، 2023 جىلعى 1 ساۋىرگە دەيىن كولىك سالىعىن تولەمەگەندەردىڭ ءىسى سوتقا جولدانادى.

ونىڭ ايتۋىنشا، قالادا 441 221 جەكە تۇلعانىڭ اتىنا تىركەلگەن 709 944 كولىك بار.

بيىل 1 ساۋىرگە دەيىن كولىك يەلەرىنىڭ ءبارى مىندەتتى تۇردە 2022 جىلعى سالىقتى تولەۋگە ءتيىس. تولەم ۋاقتىلى جاسالماعان جاعدايدا، ءاربىر كەشىكتىرىلگەن كۇن ءۇشىن قايتا قارجىلاندىرۋدىڭ رەسمي ستاۆكاسىنىڭ 1،25 ەسەلەنگەن مولشەرىندە ءوسىمپۇل الىنادى. بورىشكەرگە 30 جۇمىس كۇنى ىشىندە بەرەشەكتى وتەۋ تۋرالى حابارلاما جىبەرىلەدى. حابارلاندىرۋ مەرزىمى وتكەننەن كەيىن بەرەشەك سوماسى 1 اەك-تەن (3 450 تەڭگە) اسسا، بورىشكەرگە 5 جۇمىس كۇنى ىشىندە بەرەشەكتى ءوندىرىپ الۋ تۋرالى سالىق بۇيرىعى جىبەرىلەدى، - دەدى ول وڭىرلىك كوممۋنيكاسيالار قىزمەتىندە وتكەن بريفينگتە.

بورىشكەرلەرگە سوت ورىنداۋشىلارى تاراپىنان ودان ءارى ماجبۇرلەۋ شارالارى قولدانىلادى: مۇلكى مەن بانك شوتتارىنا تىيىم سالۋدان ەلدەن شىعۋعا دەيىن.

سالىقتى e-Salyq Azamat ءموبيلدى قوسىمشاسى نەمەسە www.kgd.gov.kz ارقىلى ءارى «قازپوشتا» اق فيليالدارىندا نەمەسە بانكتەردىڭ ءموبيلدى قوسىمشالارى ارقىلى دا تولەۋگە بولادى.

سالىقتى قازاقستاندىقتار كولىك يەسىنىڭ تۇرعىلىقتى جەرى بويىنشا تولەيدى.