سالماعى التى كەلىدەن اساتىن الىپ بالا دۇنيەگە كەلدى

نارەستە №5 قالالىق پەرزەنتحاناسىندا ومىرگە كەلدى.

سالماعى 6 كگ 300 گرامم نارەستەنى دارىگەرلەر كەسار تىلىگىن جاساپ الدى، دەپ حابارلايدى Almaty-akshamy.kz.

«جۇكتى ايەل پەرزەنتحاناعا تولعاتىپ ءتۇستى، قابىلداۋ كەزىندە ۋلترادىبىستىق زەرتتەۋ بالانىڭ سالماعى 4 كگ 800 گرامم ەكەنىن كورسەتتى. بۇل ۋلترادىبىستىق زەرتتەۋ كەزىندە بالانىڭ سالماعى باستىڭ بيپاريەتالدى ولشەمىنە جانە قۇيرىق-پاريەتالدى ولشەمىنە بايلانىستى ەسەپتەلەدى»،- دەدى جاڭا تۋعان نارەستە بولىمشەسىنىڭ مەڭگەرۋشىسى ساۋلە كەنەنبايەۆا.

ايتۋىنشا، وپەراسيا ءساتتى ءوتتى.

«سالماعى 6300 گرامم بولاتىن ءسابي - ءبىزدىڭ پەرزەنتحانادا دۇنيەگە كەلگەن ەڭ الىپ بالا. بوسانۋ وپەراسيالىق ادىسپەن جۇزەگە اسىرىلدى. وپەراسيا ءساتتى ءوتتى. ءبارى جاقسى اياقتالدى. انا مەن ونىڭ ۇلى ساۋ. بۇل وتباسىنداعى ءۇشىنشى بالا»، - دەپ ءتۇسىندىردى دارىگەر.

مامان اتاپ وتكەندەي، ءتورت كەلىدەن اساتىن بالالار ۇلكەن بولىپ سانالادى، ال 5 كگ اساتىن نارەستە الىپ دەپ اتالادى.

«ءقازىر اناسى مەن بالاسى پەرزەنتحانانىڭ مەديسينا قىزمەتكەرلەرىنىڭ تاۋلىك بويى باقىلاۋىندا جانە جاقىن ارادا پەرزەنتحانادان شىعۋعا دايىندالىپ جاتىر»، - دەدى دارىگەر.