سالاۋات ايتىپ، ساۋاپقا كەنەلەتىن اي

ءماۋلىت ايى باستالدى. 

ارداقتى پايعامبارىمىز مۇحاممەدتىڭ (وعان اللانىڭ سالاۋاتى مەن سالەمى بولسىن) دۇنيەگە كەلگەن ايى قاسيەتتى ءماۋلىت مەرەكەسى باستالدى، دەپ حابارلايدى Almaty-akshamy.kz Muftyat.kz-كە سىلتەمە جاساپ.

ءماۋلىت ايى – اللا ەلشىسىنىڭ (وعان اللانىڭ سالاۋاتى مەن سالەمى بولسىن) ونەگەلى ءومىرىن، ساۋاپقا تولى سۇننەت امالدارىن حالىققا ناسيحاتتاۋدىڭ، ءدىنىمىزدىڭ اسىل قۇندىلىقتارىن دارىپتەۋدىڭ تاپتىرماس مۇمكىندىگى. بۇل ايدا مەشىتتەردە اللاعا ماداق، پايعامبارىمىزعا سالاۋات ايتىلىپ، ءماۋلىت جىرى وقىلادى.

پايعامبارعا (وعان اللانىڭ سالاۋاتى مەن سالەمى بولسىن) سالاۋات ايتۋ – ساۋاپقا كەنەلۋ امالى. مۇسىلمان بالاسى اللاعا ماداق ايتۋمەن قاتار، ونىڭ پايعامبارىنا (وعان اللانىڭ سالاۋاتى مەن سالەمى بولسىن) سالەم جولدايدى. اللا تاعالا قۇراندا: «راسىندا، اللا جانە ونىڭ پەرىشتەلەرى پايعامبارعا سالاۋات ايتادى. ۋا، يمان كەلتىرگەندەر! سەندەر دە وعان سالاۋات ايتىپ، سالەم جولداڭدار» («احزاب» سۇرەسى، 56-ايات) دەپ ءامىر ەتكەن. ال ارداقتى پايعامبارىمىز (وعان اللانىڭ سالاۋاتى مەن سالەمى بولسىن): «كىم ماعان ءبىر سالاۋات ايتسا، اللا تاعالا وعان ون سالاۋات ايتادى» دەگەن.

تاعى ءبىر حاديستە: «كىم ماعان ءبىر سالاۋات ايتسا، وعان اللا ون سالاۋات ايتادى جانە ونىڭ ون قاتەلىگىن كەشىرەدى ءارى ونىڭ دارەجەسىن ون ەسەگە كوتەرەدى» دەلىنگەن. ءبىز بۇل حاديستەن سالاۋات ايتقان ادام وزىنە جاقسىلىق جاساعانمەن تەڭ ەكەنىن تۇسىنەمىز. سەبەبى، ءبىز سالاۋات ايتۋ ارقىلى اللانىڭ بىزگە سالاۋات ايتۋىنا جانە بەس كۇن جالعاندا بىلىپ-بىلمەي ىستەگەن قاتە-كەمشىلىكتەرىمىز بەن كۇنالارىمىزدىڭ كەشىرىلۋىنە، سونىمەن قاتار دارەجەمىزدىڭ ون ەسە كوتەرىلۋىنە سەبەپشى بولامىز.

بۇكىل الەمگە مەيىرىم، ۇلگى-ونەگە رەتىندە جىبەرىلگەن پايعامبارىمىزدىڭ (وعان اللانىڭ سالاۋاتى مەن سالەمى بولسىن) سۇننەتىن جاڭعىرتۋ – ساۋاپتى امالدىڭ ءبىرى.