الماتىنىڭ ءايبوليتى

الماتىداعى حايۋاناتتار باعىندا 25 جىل بويى جۇمىس ىستەپ كەلە جاتقان ازامات دۇيسەنوۆ زووباقتىڭ قۇرمەتتى قىزمەتكەرى اتاندى.

ازاماتتىڭ جانۋارلارعا دەگەن قىزىعۋشىلىعى مەكتەپ جاسىنان باستالعان. وعان  اتا-اناسى العاش رەت اكۆاريۋم مەن بالىق سىيلاعان. وعان قوسا مىسىق پەن ءيتى بولىپتى. ۆەتەرينار ماماندىعىنا بەتبۇرىسى قىزىعۋشىلىقتان ەمەس مىسىقتى ەمدەمەك بولعان ارەكەتىنەن باستالىپتى. مىسىعىن ەمدەي الماعان ازامات مال دارىگەرى بولۋعا بەل بۋعان. 

«مىسىعىمنىڭ باس-مي جاراقاتى اۋىر بولدى. قوزعالماي جاتقان جانۋاردى ءوز كۇشىممەن ەمدەمەك بولدىم. ۇيدە ۆيتامين، دارىلەر جانە شپريس بولدى. ءۆيتاميندى ۋكول ارقىلى از-ازدان سالدىم. ءبىراق كومەكتەسپەدى»، - دەيدى الماتى حايۋاناتتار باعىنىڭ باس ۆەتەرينار دارىگەرى ازامات دۇيسەنوۆ. 

ۆەتەريناردىڭ ايتۋىنشا، ءار جانۋاردىڭ وزىندىك مىنەزى بار. كەيبىرەۋلەرىن قورشاۋعا كىرىپ، ەركىن تەكسەرۋگە بولادى. كەيبىرەۋلەرىن الدىن الا دايىنداۋ كەرەك. مىسالى، ارىستاننىڭ ەستە ساقتاۋ قابىلەتى جاقسى دامىعان. وزىنە ينە سالعان ادامدى ۇزاق ۋاقىت ۇمىتپايدى.

حايۋاناتتار باعىنداعى جانۋارلاردى تەكسەرۋ تاڭ قىلاۋ بەرگەننەن باستالادى. مۇنداعى ءار ءبولىمنىڭ ارنايى ۆەتەرينارى بولادى ەكەن. مىسالى، داۋرەن كەنجەبايەۆ وسىندا 15 جىلدان بەرى جۇمىس ىستەيدى. العاشىندا ارىپتەسى ازاماتتان كوپ نارسە ۇيرەنگەنىن ايتادى.  

«جانۋارلاردى وتە جاقسى كورەتىن ازاماتتىڭ ءبىرى دەپ ايتا الامىن. بۇل ازامات ەندى ءار جانۋاردىڭ مىنەز-قۇلقىن، ەرەكشەلىگىن وتە جاقسى بىلەدى. ازاماتتى دا بىزدەگى جانۋارلاردىڭ ءبىرازى تانيدى دەپ ايتا الامىز»، - دەيدى جىرتقىش سۇتقورەكتىلەر ءبولىمىنىڭ جەتەكشىسى داۋرەن كەنجەبايەۆ.

ازامات دۇيسەنوۆتىڭ پىكىرىنشە ۆەتەريناردىڭ جۇمىسى بالالار پەدياتورىنىڭ قىزمەتى ىسپەتتى. تاۋلىكتىڭ كەز-كەلگەن ۋاقىتىنا، اۋا رايىنىڭ قولايسىزدىعىنا قاراماستان قاجەت كەزدە وسىننان تابىلىپ، جانۋارلارعا كومەك كورسەتۋ كەرەك.