ەل بويىنشا سايلاۋعا بارلىعى 10 101 ۋچاسكە ىسكە قوسىلادى.
20 قاراشادا وتەتىن پرەزيدەنتتىك سايلاۋعا 10101 ۋچاسكە ازىرلەندى، ونىڭ ىشىندە 53 ەلدە 68 سايلاۋ ۋچاسكەسى قۇرىلدى. بۇل تۋرالى ق ر ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ ايتىپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەل بويىنشا سايلاۋعا بارلىعى 10 101 ۋچاسكە ىسكە قوسىلادى، سايلاۋشىلار تىزىمىنە 11 950 485 ازامات ەنگىزىلدى. 4 قاراشادان باستاپ ەل تۇرعىندارىنا وزدەرىن تىزىمنەن تەكسەرۋگە مۇمكىندىك بەرىلدى. ۋچاسكەلىك كوميسسيالار ءوز وكىلەتتىكتەرى بويىنشا تىزىمدەردەگى قاتەلەر مەن دالسىزدىكتەر تۋرالى وتىنىشتەردى قارايدى، ولارعا ءتيىستى وزگەرىستەر ەنگىزۋ ماسەلەلەرىن شەشەدى. قازاقستان رەسپۋبليكاسىنىڭ شەت مەملەكەتتەردەگى وكىلدىكتەرى جانىنان 53 ەلدە 68 سايلاۋ ۋچاسكەسى قۇرىلدى»، - دەدى ق ر وسك ءتوراعاسى شەتەلدىك ديپلوماتيالىق كورپۋس وكىلدەرىنە ارنالعان بريفينگتە.
ونىڭ ايتۋىنشا، ورتالىق سايلاۋ كوميسسياسى ق ر پرەزيدەنتىنىڭ كەزەكتەن تىس سايلاۋىندا داۋىس بەرۋگە ارنالعان سايلاۋ بيۋللەتەنىنىڭ ءماتىنىن بەكىتتى.
سونداي-اق، وسك باسشىلىعى مەن مۇشەلەرى بارلىق وڭىرلەرگە بارىپ، اۋماقتىق سايلاۋ كوميسسيالارىنىڭ، ۋچاسكەلىك سايلاۋ كوميسسيالارىنىڭ، داۋىس بەرۋگە ارنالعان ۋچاسكەلەردىڭ دايىندىعىن، بارلىق قاجەتتى ينفراقۇرىلىمنىڭ دايىندىعىن تەكسەرگەن.
ايتا كەتەيىك، ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى مەن ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ شەتەلدىك ديپلوماتيالىق كورپۋس وكىلدەرىنە الداعى پرەزيدەنت سايلاۋىنا دايىندىق تۋرالى باسپا ءسوز ءماسليحاتىن وتكىزدى.