پرەزيدەنتتىڭ ءوزى مۇنىڭ جاي ەمەستىگىن ايتتى.
مەملەكەت باسشىسى قاسىم-جومارت توقايەۆ كەزەكتەن تىس پرەزيدەنت سايلاۋى جاريالانعالى بەرى ەلىمىزگە كيبەرشابۋىل كۇشەيگەنىن مالىمدەدى، دەپ حابارلايدى Almaty-akshamy.kz اقورداعا سىلتەمە جاساپ.
پرەزيدەنت سايلاۋ ناۋقانى كەزىندە ەل مۇددەسىنە كەرەعار پىكىر ايتاتىن، ءتىپتى، جالعان اقپارات تاراتاتىن ادامدار پايدا بولۋى مۇمكىن ەكەنىن ەسكەرتىپ، حالىقتى ساق بولۋعا ۇندەدى.
توقايەۆ سوڭعى كۇندەرى قازاقستانعا جاسالىپ جاتقان كيبەرشابۋىلداردى الداعى كەزەكتەن تىس پرەزيدەنت سايلاۋىمەن بايلانىستىردى.
«سايلاۋ جاريالانعان سوڭ، ءتۇرلى جالعان دەرەكتەر، اقپارات، ياعني فەيكتەر تاراتىلىپ، كيبەرشابۋىلدار كۇشەيدى. بۇل جايدان جاي ەمەس. كەيبىر كۇشتەر شەتەلدەن وسىنداي ارەكەتتەردى ۇيىمداستىرىپ، ەل ىشىنە ىرىتكى سالۋدى كوزدەيدى. ولار قازاقستاندا وڭ وزگەرىستەرگە كەدەرگى جاساعىسى كەلەدى. ءبىراق ءبىز باعىتىمىزدان تايمايمىز»، - دەدى ول اباي وبلىسىنىڭ جۇرتشىلىعىمەن كەزدەسۋىندە.
ايتۋىنشا، بيىل جازدا وتكەن رەفەرەندۋم ناتيجەسى باعدارىمىزدىڭ دۇرىستىعىن كورسەتتى. جۇرتشىلىق اتا زاڭعا ۇسىنىلعان وزگەرىستەردى قولدادى. كونستيتۋسيالىق رەفورما ساياسي جاڭعىرۋ جولىنداعى ماڭىزدى قادام بولدى.
«بيلىك تارماقتارى اراسىنداعى تەپە-تەڭدىك نىعايا ءتۇستى. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» قاعيداتى ورنىقتى. بۇل پرەزيدەنتتىك رەسپۋبليكا بولادى دەگەن ءسوز. راسىندا، ەل باسقاراتىن پرەزيدەنت قۇزىرلى، كۇشتى بولۋى كەرەك. ايتپەسە، كەيبىر باسقا ەلدەردەگى سياقتى تارتىپسىزدىككە ۇشىراۋىمىز مۇمكىن. ال، ونداي جاعداي حالقىمىزعا قاسىرەت اكەلەدى»، - دەپ سانايدى توقايەۆ.
مەملەكەت باسشىسى كەلەسى جىلى ءماجىلىس پەن ءماسليحات دەپۋتاتتارى ارالاس جۇيە بويىنشا سايلاناتىنىن ەسكە سالدى.
ال ءوڭىر باسشىلارى بالامالى جولمەن تاڭدالادى. اۋىل اكىمدەرىن تىكەلەي سايلاۋ ءتاسىلى ەنگىزىلدى.
سونىمەن قاتار ساياسي پارتيالارعا زاڭ جۇزىندە تىڭ مۇمكىندىكتەر بەرىلدى. جۇرتتىڭ مەملەكەتتى باسقارۋ ىسىنە اتسالىسۋىنا جول اشىلدى، دەدى پرەزيدەنت.
ايتا كەتەرى، بۇگىن پرەزيدەنت قاسىم-جومارت توقايەۆ جۇمىس ساپارىمەن اباي وبلىسىنا باردى.
ەسكە سالساق، جۋىردا مەملەكەتتىك تەحنيكالىق قىزمەت بىرنەشە كۇننەن بەرى قازاقستاندىق ينتەرنەت سەگمەنىنە كيبەرشابۋىلدار جاسالىپ جاتقانىن حابارلادى.
ۆەدومستۆو مالىمەتىنشە، ماقساتتى كيبەرشابۋىلدار ەلدىڭ مەملەكەتتىك ورگاندارىنا جانە قازنەتتىڭ ينفراقۇرىلىمىنا باعىتتالعان. كيبەرشابۋىل سالدارىنان ينتەرنەت بايلانىسىنىڭ ناشارلاۋى بايقالادى.