سايلاۋ: بايقاۋشىلاردىڭ ادەپ كودەكسى ازىرلەندى

بايقاۋشىلار بارلىق كانديداتقا بەيتاراپ بولۋى ءتيىس.

ەلىمىزدە وتەتىن كەزەكتەن تىس پرەزيدەنت سايلاۋىنا وراي بايقاۋشىلاردىڭ ادەپ كودەكسى ازىرلەندى. بۇل تۋرالى پارتيالىق ەمەس بايقاۋ ورتالىعىنىڭ ءتوراعاسى تولەگەن كۇنادىلوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«بايقاۋشىلاردىڭ ادەپ كودەكسى ازىرلەندى. 3 قاراشادا بارلىق سەرىكتەستەرىمىزدىڭ، كانديداتتاردىڭ رەسپۋبليكالىق شتاب وكىلدەرىنىڭ باسىن قوسۋدى جوسپارلاپ وتىرمىز. جالپى، تاجىريبەدە بايقاۋشىلاردىڭ وزدەرى زاڭ بۇزۋشىلىققا جول بەرەتىنى كەزدەسەدى. الداعى وتەتىن كەزدەسۋدە اتالعان قۇجاتتى تالقىلاپ، قابىلداۋدى كوزدەپ وتىرمىز. ودان كەيىن ونى جۇمىس ىستەۋ ءۇشىن ورتالىق سايلاۋ كوميسسياسىنا جىبەرەمىز»، - دەدى تولەگەن كۇنادىلوۆ ەلوردادا وتكەن بريفينگ بارىسىندا.

ول بايقاۋشىلار زاڭدىلىق پەن اشىقتىقتى ساقتاپ، بارلىق كانديداتقا بەيتاراپ بولۋى تيىستىگىن باسا ايتتى. سونىمەن قاتار سوڭعى ۋاقىتتا بايقاۋشىلار تاراپىنان سايلاۋ ۇدەرىسىنە قىزىعۋشىلىق ارتىپ كەلە جاتقانىن ەرەكشە اتاپ ءوتتى.

«ەگەر 2010 جىلعى سايلاۋعا 29 مىڭ ادام بايقاۋشى رەتىندە قاتىسسا، 2019 جىلى ولاردىڭ سانى 45 مىڭعا جەتتى. ال 2021 جىلى وتكەن پارلامەنتتىك سايلاۋعا 74 مىڭ بايقاۋشى تىركەلدى. قوعامنىڭ قىزىعۋشىلىعى ارتىپ كەلەدى. ازاماتتىق قوعام بايقاۋشى رەتىندە كوپ قاتىسقان سايىن ازاماتتاردىڭ تاڭداۋى زاڭمەن قورعالا تۇسەدى»، - دەدى ورتالىق ءتوراعاسى.