بۇل جەرلەردى قۇربانداردى اقتاۋ ماقساتىندا قۇرىلعان وڭىرلىك جۇمىس توبى انىقتادى
اقمولا وبلىسىندا ساياسي قۋعىن-سۇرگىن قۇرباندارى جازاسىن وتەگەن 4 بىردەي لاگەردىڭ ورنى تابىلدى. تورتەۋى دە زەرەندى اۋدانىنىڭ اۋماعىندا ورنالاسقان، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
بۇرىن-سوڭدى بەيمالىم بولعان بۇل جەرلەردى قۇربانداردى اقتاۋ ماقساتىندا قۇرىلعان وڭىرلىك جۇمىس توبى انىقتادى. قۋعىن-سۇرگىن قۇرباندارى قاماۋدا بولعان لاگەرلەردىڭ ءبىرى ۇلگىلى اۋىلىنىڭ ماڭىندا ورنالاسىپتى. تاريحشىلار بۇل جەردى ءبىر جىل بويى زەرتتەدى. مۇندا ءتىپتى سوتتالعانداردى كۇزەتكەن وفيسەرلەردىڭ دە زيراتى بار ەكەن.
«جەرگىلىكتى اقساقالداردىڭ ايتۋىنشا، بۇل لاگەر 1936 جىلدان باستاپ 1952-1953 جىلدارعا دەيىن جۇمىس ىستەگەن. 2 مىڭعا جۋىق ادام سوتتالعان. نەگىزىنەن بۇل جەردە سوتتالعاندار ساياسي تۇتقىندار، مۇعالىمدەر دە بولعان، ءبىرىن ءبىرى كورسەتكەن اۋىل پرەدسەداتەلدەرى، ءبىر ۋىس بيداي ءۇشىن سوتتالعاندار دا وسى جەردە وتىرعان كورىنەدى»، – دەيدى زەرەندى اۋداندىق مەملەكەتتىك مۇراعات ديرەكتورى تىلەگەن سەيفۋللين.
زەرتتەۋشىلەر بۇل اراعا ارنايى بەلگى ورناتىپ، قۇرباندارعا قۇران باعىشتادى. ەندىگى ماقسات لاگەر ورنىنا ەسكەرتكىش قويىپ، مۇندا بولعانداردىڭ ءتىزىمىن انىقتاۋ.
ساياسي قۋعىن-سۇرگىن قۇرباندارىن اقتاۋ جونىندەگى جۇمىس توبىنىڭ وتىرىسىنا تاريحشىلاردان بولەك اۋىل اقساقالدارى دا قاتىسىپ، كورگەن-بىلگەندەرىن ورتاعا سالدى.
ال قالعان لاگەرلەردىڭ ورنى باراتاي، سيمفەروپول جانە پريرەچنىي اۋىلدارىنىڭ ماڭىندا ورنالاسقان. ەندى ولاردىڭ ءبارى جان-جاقتى زەرتتەلىپ، تاريحي جەرلەرگە تۋريستىك باعىت تا اشىلادى. تاريحشىلار مۇنداي تۇرمەلەر ءبىرجان سال اۋدانىنىڭ اۋماعىندا دا بولۋى مۇمكىن دەگەن بولجام ايتىپ وتىر.