الماتى قالاسىنىڭ اكىمى باقىتجان ساعىنتايەۆ «الماتى مەكتەپتەرى پوستكوۆيدتىك كەزەڭدە: ءبىلىم ساپاسى، بالالاردىڭ دەنساۋلىعى جانە وتباسىنىڭ ءرولى» فورۋمىندا مۇعالىمدەردىڭ كاسىبي ءوسۋىن قولداۋ مەن ىنتالاندىرۋدىڭ جاڭا شارالارى تۋرالى ايتتى.
باقىتجان ساعىنتايەۆ فورۋمعا قاتىسۋشىلار الدىندا سويلەگەن سوزىندە فورۋمدا ءداستۇرلى فورماتتاعى جۇمىستى جاڭعىرتۋ ءۇشىن الدا تۇرعان ماڭىزدى مىندەتتەردىڭ تالقىلانعانىن اتاپ ءوتتى، دەپ حابارلايدى Almaty-akshamy.kz
«بۇل مىندەتتەردى ءتيىمدى شەشۋدە باستى ءرول مۇعالىمدەرگە تيەسىلى. سوندىقتان جاڭا وقۋ جىلىندا ءبىز مۇعالىمدەردى قولداۋ شارالارىن جۇزەگە اسىرۋدى جالعاستىرامىز، ءبىرىنشى كەزەكتە ولاردىڭ كاسىبي شەبەرلىكتەرىنىڭ ءوسۋىن ىنتالاندىرامىز»، - دەپ اتاپ ءوتتى مەگاپوليس اكىمى باقىتجان ساعىنتايەۆ.
ونلاين-وقىتۋ تاجىريبەسى بۇگىندە مەكتەپتەردىڭ جاڭاشىلدىققا، يننوۆاسياعا اشىق، ءوزىن ۇنەمى دامىتۋعا جانە شىعارماشىلىق وسۋگە ۇمتىلاتىن مۇعالىمدەر مۇقتاج ەكەنىن ايقىن كورسەتتى.
«ءبىز مۇعالىمدەرگە وسىنداي مۇمكىندىك بەرگىمىز كەلەدى، سوندىقتان بۇگىن ءبىز ن.نازاربايەۆتىڭ ءبىلىم قورىمەن بىرگە باستى ماقساتى سيفرلىق تەحنولوگيالاردى وقىتۋ مەن مەڭگەرۋدى جانە سيفرلىق پەداگوگيكانىڭ ۇزدىك ادىستەرى تاجىريبەسىن ۇيرەتەتىن Digital Ustaz Almaty جاڭا بايقاۋىنىڭ باستالعانىن حابارلايمىز»، - دەدى الماتى اكىمى.
بايقاۋ 3 كەزەڭدە وتەدى، ولاردىڭ ءارقايسىسىنا ءبىلىم بەرۋ سالاسىنداعى ۆەبينارلار مەن شەبەرلىك ساعاتتارىنىڭ، كوشباسشىلاردىڭ جەتەكشى حالىقارالىق سپيكەرلەرى قاتىسادى.
بايقاۋ جەڭىمپازدارى ءۇشىن باعالى سىيلىقتار قاراستىرىلعان، ال ءبىرىنشى ورىن يەگەرى ءبىلىم تاعىلىمداماسىنان ءوتۋ ءۇشىن لوندونعا نەمەسە حەلسينكيگە بارادى.
«مۇعالىمدەردى Digital Ustaz Almaty بايقاۋىنا بەلسەندى قاتىسۋعا شاقىرامىن. وسىلايشا ولار بىلىكتىلىكتەرىن ارتتىرۋمەن قاتار سيفرلىق داۋىردە جۇمىس ىستەۋدىڭ جاڭا تاسىلدەرىن زەرتتەۋگە قادام جاسايتىن بولادى»، - دەپ باقىتجان ساعىنتايەۆ قالانىڭ پەداگوگيكا قاۋىمداستىعىنا نازار اۋداردى.